BAUCAU, 15 janeiru 2024 (TATOLI) – Profesór kontratadu hamutuk na’in-13 deside kontinua hanorin iha Eskola Sekundária Jerál (ESG, sigla portugés) hodi hein desizaun hosi Ministériu Edukasaun.
Diretór ESG Dom Carlos Belo, suku Afaça, postu Quelicai, Carlos Ximenes Filipe, esplika, profesór hirak-ne’e maske kontratu termina ona iha loron 31 dezembru 2023, maibé kontinua hanorin tanba konsidera eskola refere hahú harii hosi esforsu profesór sira-ne’e.
“Hau kontaktu hotu ona sira no prontu hanorin hodi hein prosesu tuir mai hosi Ministériu Edukasaun,” Diretór ESG Dom Carlos Belo informa ba Agência TATOLI liuhosi telefónika, segunda ne’e.
Dirijente ESG Dom Carlos Belo laiha akordu ruma ho profesór sira-ne’e, maibé tanba konsidera inísiu eskola refere eziste tanba kontribusaun mós hosi profesór na’in-13 ne’e to’o hetan kontaktu iha tinan-2023 no termina iha dezembru 2023.
Carlos Filepe, argumenta, profesór sira-ne’e prontu simu desizaun ikus hosi ME no deside tuir teste bolsa kandidatu bainhira Edukasaun nasionál anunsia vaga iha futuru.
“Ha’u husu Ministériu Edukasaun atu konsidera ami-nia pedidu tanba bainhira laiha resposta, sei impkatu ba prosesu aprenizajen tanba profesór laiha,” Carlos Filipe akresenta.
Diretór Serbisu Munisipál Edukasaun Baucau, Augosto Ornai Ximenes, apresia ho inisiativa hosi profesór kontratadu sira maibé parte edukasaun Baucau laiha orientasaun atu kontinua hanorin tanba bazea ba karta sirkulár hosi Ministériu Edukasaun katak kontratu termina ona iha loron-31 dezembru 2023.
“Ha’u la orienta, maibe kestaun komunidade ka autoridade lokál hamutuk ho profesór sira-ne’e iha konkordánsia ne’e sira mak deside mesak,” Augosto Ximenes argumenta.
ESG Dom Carlos Belo filiál ba Eskola Sekundária Jerál Públiku numéru 1 Baucau ho totál profesór na’in-15 hanesan kontratadu na’in-13, komposta mane-10 no feto na’in-tolu inklui permanente na’in-rua.
Eskola refere ho torál estudante 126 komposta hosi désimu primeiru-anu to’o désimu terseiru-anu.
Jornalista : Natalino Belo
Editór : Evaristo Soares Martins
