Profesór na’in-neen EBF Osso-uaque Fatulia kontinua hein desizaun Ministériu Edukasaun
BAUCAU, 15 janeiru 2024 (TATOLI) – Profesór kontratadu na’in-neen hosi Eskola Báziku Filiál (EBF) ne’ebé lokaliza iha aldeia Osso-uaque, suku Fatulia, postu administrativu Venilale, munisípiu Baucau, deside kontinua hanorin hodi hein desizaun hosi Ministériu Edukasaun (ME).
Ho desizaun Ministériu Edukasaun deside hapara profesór kontratadu iha loron 31 dezembru tinan 2023 liubá, halo lamentasaun barak mai hosi profesór kontratadu sira.
Nune’e Xefe Suku Fatulia, Angelino Moisés Pereira, nu’udar lideransa komunitária buka solusaun liuhosi mediasaun nune’e prosesu ensinu no aprenidijazen labele paradu.
Ne’e duni, líder lokál ne’e halo ona diskusaun naruk ho dirijente eskola refere nune’e prosesu ensinu no aprendizajen labele paradu tanba konsidera estudante sira nu’udar jerasaun kontinuadór iha futuru.
Xefe suku Fatulia, Angelino Moisés Perreira, esplika, hafoin halo protesta relasiona ho kontratadu ikus mai iha solusaun entre autorodade suku ho dirijente eskola refere liuhosi mediasaun nune’e prosesu aprendizajen kontinua la’o, maske seidauk hetan desizaun hosi Ministériu Edukasaun.
“Desizaun sira kontinua hanorin tanba estudante sira abandona entaun ladún di’ak, sira kontinua hein karta sirkulár ruma hosi Ministériu Edukasaun,” Xefe suku Fatulia hateten iha Vila Nova, segunda ne’e.
Profesór hirak-ne’e husu atu Ministériu Edukasaun kontinua estende sira-nia kontratu no presiza esplika ho klareza kona-ba estatutu nu’udar manorin na’in iha eskola refere.
“Karik hapara profesór na’in-neen ne’e, ita bele konsidera labarik sira abandona ona tanba profesór na’in-ida deit labele kobre sala aula neen,” Moisés Perreira akresenta.
Diretór Serbisu Munisipál Edukasaun Baucau, Augosto Ornai Ximenes, apresia ho inisiativa hosi profesór na’in-neen, maibe parte edukasaun Baucau laiha orientasaun atu profesór kontratadu sira kontinua hanorin tanba bazea ba karta sirkulár hosi Ministériu Edukasaun katak kontratadu termina ona iha loron-31 dezembru 2023 liubá.
“Ha’u la orienta, maibe kestaun komunidade kñno autoridade lokál hamutuk ho profesór sira-ne’e iha konkordánsia ne’e sira mak deside mesak,” Augosto Ximenes argumenta.
Parte diresaun edukasaun Baucau hamutuk autoridade postu Venilale iha devér no hala’o ona aprosimasaun ho dirijente EBF Osso-uaque atu eskola refere kontinua loke, maske iha profesór permanente na’in-ida tanba desizaun sei fó-sai hosi Ministériu Edukasaun.
EBF primeiru siklu no segundu siklu Osouali-lale, aldeia Osso-uaque, nu’udar eskola filiál ba Ensinu Báziku Sentrál Uabua, postu Venilale, ne’ebé akumula estudante hosi suku haat postu admistrativu tolu hanesan suku Ossouala, postu Vemasse.
Nune’e mós suku Liaruca no Builale, postu administrativu Ossu, munisípiu Viqueque inklui suku Fatulia, postu Venilale.
Profesór kontratadu iha EBF Osso-uaque liuhosi protesta iha loron 06 janeiru 2024 hakerek panfletu taka iha odamatan eskola, hodi la autoriza estudante sira tama sala aula to’o ME foti desizaun kona-bá prosesu kontratu.
Nune’e mós panfletu refere sita mós la autoriza kualkérr profesór seluk atu substitui tanba konsidera kontribui ona ba dezenvolvimentu edukasaun iha área Osso-uaque hanesan oferese rai hodi konstrui eskola refere.
Totál estudante iha EBF Osso-uaque hamutuk na’in-150 no profesór na’in-hitu, komposta hosi permanente na’in-ida no kontratadu na’in-neen.
Jornalista : Natalino Belo
Editór : Evaristo Soares Martins
