DILI, 16 janeiru 2024 (TATOLI) – Prezidente Asosiasaun Tane Konsumidór Antonio Ramos da Silva ho ekipa hasoru malu ho Prezidente Repúblika José Ramos Horta hodi relata servisu ne’ebé hala’o ona iha 2023.
“Ami mai relata servisu Tane Konsumidór nian ba Prezidente Repúblika kona-ba servisu ne’ebé ami halo iha tinan 2023 hanesan halo advokasia ba konsumidór sira, sosializasaun informasaun ba ita-nia konsumidór sira no saida mak ami atu halo ba oin”, Antonio dehan ba jornalista sira iha Palásiu Prezidensiál, ohin.
Iha okaziaun ne’e, Tane Konsumidór hato’o mós sujestaun balun ba Prezidente Repúblika kona-ba situasaun ne’ebé Timor-Leste hasoru agora daudaun.
“Ami hato’o mós ami-nia sujestaun balun ba Prezidente Repúblika kona-ba situasaun ne’ebé agora daudaun ita hasoru, liuliu aimoruk iha ospitál sira la iha, situasaun agora iha ospitál tanba servisu saúde mós parte ida hosi direitu protesaun hosi Tane Konsumidór”, nia hatete.
Aleinde ne’e, Tane Konsumidór hasoru Xefe Estadu hodi re-indika fila fali kadernu rebilikativu ne’ebé hatama ba Governu anteriór liuliu inisiativa lei sira ne’ebé Tane aprezenta ona ba Konsellu Ministru iha VIII Governu no husu atu Governu da-sia bele fó mós atensaun tanba objetivu Estadu nian ne’ebé atu adere ba ASEAN no OMK tenke iha lei balun ba Tane Konsumidór atu kontribui.
Tane Konsumidór nia misaun mak defende interese no direitu konsumidór hothotu nian iha Timo-Leste, la iha destinsaun, garante ba moris, saúde no seguransa no kualidade sasan no servisu sira.
Tane mós haree ba konsumidór sira-nia direito iha Timor-Leste ne’ebé konsagra ona iha Lei Inan Repúblika Demokratika Timor-Leste nian no mós iha lei protesaun ba konsumidór no dekretu lei Nú 8/2016.
Jornalista: Hortencio Sanchez
Editór : Zezito Silva
