DILI, 17 janeiru 2024 (TATOLI)—Konservasaun Internasionál Timor-Leste, kuarta ne’e, entrega karreta, motór inklui ekipamentu serbisu ba Sekretaria Estadu Floresta (SEF) hodi uza ba atividade instituisaun.
Diretór Konservasaun Internasionál Timor-Leste, Manuel Mendes, hateten, inisiativa ne’e nu’udar kompromisu hakarak apoiu Governu hala’o serbisu iha área floresta.
“Sasán ne’ebé ita apoiu ba Sekretaria Estadu Floresta mak hanesan karreta Hilux rua, motór Kawasaki rua inklui ekipamentu serbisu hanesan kamera Sony rua, Dell optiplex rua, jeradór ida, GPS Delorme haat inklui projetór ida,” Diretór relata liuhosi ninia diskursu, iha edifísiu SEF, Caicoli.
Notísia relevante : Konservasaun Internasionál fó apoia ba protesaun natureza iha Timor-Leste
Fasilidade hirak ne’e ho kustu $87.529, hanesan karreta Hilux Double Cabin $39.000/unidade, motor Kawasaki KLC 150 $2.700/unidade, GPS Delorme haat hamutuk $2.224, kamera Sony DSC HX900 $312, kamera Nikon Coolpix A900 $308, desktop Dell Optiplex 7070SFF $490 jenerator Type 2500-Yasuka $275, no Projector Epson EB-E500 $520.
Diretór husu funsionáriu SEF hodi uza didi’ak sasán ne’ebé entrega, tanba apoiu hirak ne’e la’ós foin oferese maibé antes ne’e apoiu ona motór neen ba Parke Nasionál Nino Conis Santana no foin lalais hola tan motór tolu ba área protejida Kutulau nian.
Iha fatin hanesan, Sekretáriu Estadu Floresta, Fernandino Vieira da Costa, apresia ba apoia hirak ne’e.
“Ha’u agradese tebes ba Konservasaun Internasional Timor-Leste tanba ekipamentu ne’ebé sira fó bele apoiu tebes ita-nia serbisu,” nia tenik.
Karreta, motór no materiál sira seluk ne’ebé ohin SEF simu, ba oin uza ba serbisu iha nasionál, maibé motór inklui sasán sira seluk sei apoiu serbisu iha munisípiu ne’ebé implementa projetu serbisu ekosistema nian ne’ebé hala’o iha Baucau, Viqueque, Lautém no Ermera.
Jornalista : Arminda Fonseca
Editora : Julia Chatarina
