DILI, 17 janeiru 2024 (TATOLI) – Asosiasaun Kafé Timor (ACT,sigla Portugés), hakarak kontinua promove kafé Timor-Leste ho tipu robusta no arabika iha rai laran no estranjeiru, tanba produtu kafé Timor ne’e iha kualidade ba konsumu.
“Ita promove kafé hira ne’e ho kualidade, tanba ita ko’alia quantidade ita lakon ho Vietname no Brázil, tanba ita nasaun ida ki’ik. Maibé kona-ba kuliadae ita bele tama iha merkadu no konesidu mundiál”, Prezidente ACT ne’e afirma liuhosi programa intervista esklusivu iha studio Agência TATOLI iha Faról-Dili.
Daudaun ne’e, nia dehan ACT promove ona kafé robusta no arabika ho kuliadade iha rai li’ur hanesan kapitál Milan-Itália, Singapura, Olanda no Xina.
ACT mós halo promosaun iha rai laran liuhosi nia membru ho kompetisaun kona-ba kualidade kafé hodi anunsia tinan-tinan prémiu ba manán na’in ho kafé kualidade.
Nune’e, nia esplika atu garante kualidade kafé hodibele hetan promosaun di’ak liu iha rai laran no rai liur presiza kuda kafé no halo koleta.
“Bainhira ita kuda sala kafé ladun prodús di’ak no ita ku’u kafé la ho di’ak no sona ladi’ak, kafé ba merkadu mós laiha kualidade”, nia afirma.
ACT daudaun ne’e iha laboratóiu no iha juri timoroan na’in tolu nia kuliafikadu atu koko oinsá atu garante kualidade kafé Timor.
“Ha’u husu ba ema hotu atu bele hasa’e kualidade no kuantidade kafé hodi bele kompete iha rai laran no rai liur. Ha’u mós sujere ba Governu hodi bele fó asisteésia administrativa hodi fasilita dokumentu ba esportasaun. Alende ne’e halo koperasaun no aloka mós orsamentu ba asosiasisaun hodi investe promosaun kafé timor”, nia sujere.
Notísia relevante: ETCI hakarak halo peskiza kona-ba produsaun kafé Timór
Jornalista: Jesuína Xavier
Editór : Florencio Miranda Ximenes
