iklan

BAUCAU, HEADLINE, MUNISÍPIU, SAÚDE

Saúde Baucau husu funsionáriu serbisu ho responsabilidade

Saúde Baucau husu funsionáriu serbisu ho responsabilidade

Diretór Serbisu Munisipál Saúde Baucau sesante, Domingos Guterres entrega dokumentu ba Diretór saúde atuál Cristiano Belo iha edifísiu Saúde Baucau, Vila Antiga, sesta (19/01). Imajen Agência TATOLI/Natalino Belo.

BAUCAU, 19 janeiru 2024 (TATOLI) – Dirijente Serbisu Munisipál Saúde Baucau husu funsionáriu hotu atu hamutuk kontribui ba hadi’a sistema no iha responsabilidade hodi halo atendimentu saúde ba komunidade.

Diretór Serbisu Munisipál Saúde, Cristiano Belo, liuhosi serimónia termu entrega esplika, hafoin asume knaar nu’udar diretór la’ósos atu ukun maibé atu serbí nune’e presiza apoia hosi funsionáriu hotu tanba governu hakarak povu moris diak.

“Konfiansa ne’ebé fó la’ós ha’u mesak, ita hotu-hotu tenke serbisu hamutuk hodi kontribui hamutuk lori saúde la’o ba oin,” Diretór Serbisu Munisipál Saúde hateten iha Vila Antiga, sesta ne’e.

Cristiano Belo, argumenta, nu’udar funsionáriu hanesan servidór ba estadu nune’e bainhira mosu ego sektóral hanesan kada departamentu laoo mesak inklui iha interese privadu sei fó impaktu ba dezenvolvimentu saúde iha munisípiu Baucau.

Tanba ne’e, kada profisionál saúde sira atu halo knaar tuir responsabilidade hanesan fó asisténsia saúde ba inan isin-rua sira, bebé no komunidade jerál inklui tékniku aliadu sira tenke fó garantia hodi haforsa sistema vijilánsia nune’e bele hasa’e kualidade saúde primeira.

Eis xefendepartamentu jestaun programa ne’e husu xefe sentru no postu saúde sira atu hakbesik aan ba komunidade hanesan halo tratamentu no atendimentu iha kada aldeia to’o suku.

“Ita tenkiñe hakbesik aan barak liu ba komunidade, ha’u fiar katak bele tanba ita hamutuk,” Cristiano Belo akresenta.

Serbisu saúde Baucau sei kontinua hamutuk ho autoridade munisipál inklui liña ministeriál liuliu Ministériu Saúde no parseiru dezenvolvimentu hotu atu hametin relasiona serbisu metin liután iha área saúde.

Diretór Serbisu Munisipál Saúde sesante, Domingos Guterres, hato’o rekomendasaun ba dirijente saúde foun inklui autoridade munisipál atu kontinua serbisu hotu ne’ebé relata ona iha relatóriu liuliu kondisaun infraestrutura no rekursu umanu hanesan rezolve funsionáriu kontratadu.

“Misaun hotu ona, ha’u sei kontinua serbisu ba komunidade. Hau mensajen de’it atu kontinua kaer liman hamutuk hodi haree ba asuntu ne’ebé sei falta liuliu infraestrutura no funsionáriu kontratadu,” Domingos Guterres hateten.

Serbisu saúde Baucau iha funsionáriu kompostuña hosi médiku, parteira, enfermeira, tékniku aliadu inklui pesóal apoia hanesan motorista, administrasaun, lojístika, sistema informasaun saúde no clneaner ho tótal 200-resin.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!