APA Baguia sei prioriza bee-moos ba komunidade
BAUCAU, 22 janeiru 2024 (TATOLI) – Administradór Postu Administrativu (APA) Baguia, munisípiu sei prioriza bee-moos nu’udar nesesidade bázika ba komunidade sira.
Administradór Postu Administrativu Baguia, Mário Xavier da Silva, esplika, postu Baguia maioria seidauk asesu ba bee-moos nune’e nia parte sei realiza enkontru konjunta hanesan tau ideia hamutuk atu dezenvolve nesesidade bázika ba komunidade, liuliu bee-moos.
“Prioridade liuliu ba bee-moos nune’e ita sei tau ideia hamutuk entre autoridade iha postu,” Administradór Postu Administrativu Baguia hateten iha Vila Nova, segunda ne’e.
Autoridade Baguia sei halo koordenasaun ho Autoridade Administrasaun Munisipál liuhosi sorumutu ho Prezidenti Autoridade Munisipál (PAM) hodi koalia kona-bá planu refere.
Postu Baguia enfrenta bee-moos, liuliu iha suku Alawa Kraik, Osso-huna no Samalari tanba seidauk sufisiente no maioria komunidade susar ba asesu bee-moos nune’e aproveita udan been bainhira udan monu rai.
“Maioria suku iha-ne’ebá depende ba udan-been, entaun ita difikulta tebes ba bee-mos,” Mário da Silva akresenta.
Tótal funsionáriu iha postu administrativu Baguia hamutuk na’in-sanulu ne’ebé destaka iha administrasaun postu refere.
Postu administrativu Baguia hamutuk suku 10 hanesan; Alaua Leten, Alaua Kraik, Samalari, Defauasi, Afaloicai, Osohuna, Haeconi, Larisula, Lavateri no Uacala ho tótal populasaun 12.962.
Jornalista : Natalino Belo
Editór : Evaristo Soares Martins
