Autoridade sei fó atensaun ba lixu iha Baucau
BAUCAU, 22 janeiru 2024 (TATOLI) – Autoridade Administrasaun Munisipál Baucau sei fó atensaun ba lixu ne’ebé sai preokupasaun iha munisípiu Baucau.
Prezidente Autoridade Munisipál (PAM) Baucau, Venaeranda Eurico Marques Lemos Martins, esplika, lixu sai preokupasaun ba autoridade munisípiu nune’e hafoin simu pose oreinta ona diresaun jestaun merkadu no lixu atu kada loron tenke kontinua hamoos iha sidade Baucau.
“Sé lixu mak soe namkari, hatene ona katak ita-nia uma oinsa, ita hakarak rai Baucau moos,” Prezidente Autoridade Munisipál Baucau hateten iha Vila Nova, segunda ne’e.
Veneranda Lemos, husu ba kada diretór serbisu munisipál sira atu oreinta funsionáriu sira no kolabora ho diresaun jestaun merkadu no lixu nune’e kontinua kontrola lixu iha públiku.
Autoridade Baucau sei hasai regulamentu atu kontrola lixu no animal abandona sira iha públiku nune’e labele fó impaktu moras ba komunidade no ambiente iha sidade kontinua moos.
“Husu ba komunidade atu hatene soe lixu iha fatin,” Veneranda Lemos fó hanoin.
Autoridade Baucau hakarak kolabora ho autoridade suku, eskola no xefe bairru sira atu fó atensaun másimu ba lixu hanesan hamoos ambiente iha sidade laran.
Jornalista : Natalino Belo
Editór : Evaristo Soares Martins
