PNDS sensibiliza programa 2024 ba autoridade lokál iha Baucau
BAUCAU, 23 janeiru 2024 (TATOLI) – Programa Nasionál Dezenvolvimentu Suku (PNDS) sensibiliza matadalan implementasaun atividade tinan-2024 ba autoridade suku iha munisípiu Baucau.
Reprezentante PNDS Nasionál liuhosi Sekretáriu Ezekutivu, Filomeno Pinto, esplika, atividade refere realiza tanba atu informa matadalan implementasaun atividade ba autoridade suku sira iha munisípiu Baucau.
“Matéria importante mak kona-bá lala’ok implementasaun ligadu ba partisipasaun feto no ema ho defisiénsia bele mellora di’ak liután,” Sekretáriu Ezekutivu PNDS Nasionál hateten iha Sentru Konvensaun Baucau (CCB, sigla portugés Vila Antiga, tersa ne’e.
Matéria seluk mak regra jestaun finanseira iha tinan 2024 liuliu sistema aprovizonamentu no relatóriu hosi kada suku ba munisípiu to’o nasionál.
Kona-bá atvidade depende ba reuniaun konsellu suku ne’ebé hetan ona aprovasaun iha kada postu administrativu sira inklui munisípiu nune’e parte nasionál hein halo transferénsia orsamentu hodi implementa programa refere.
“Ita-nia esperansa husu atu autoridade suku sira nu’udar autór atu halo koordenasaun di’ak ho komunidade no autoridade munisípiu rasik nune’e bele implementa atividade ho di’ak,” Filomeno Pinto akresenta.
Diretór PNDS Baucau, Amaro Gusmão Gama Fernandes, esplika, programa refere sensibiliza tanba orsamentu ba planu iha ona maibé presiza iha akordu ho autoridade lokál nune’e bainhira halo transferénsia ba konta bankária labele mosu fallansu.
“Ekipa sei tún identifika planu prioridade iha kada suku ne’ebé antes ne’e submete ona ba nasionál liuhosi postu no munisípiu,” Diretór PNDS Baucau ne’e hateten.
Orsamentu ba programa regular hamutuk milaum $ 3 resin kompostu operasionál no kustu admistrasaun ne’ebé sei implementa ba aktividade hanesan bee-mos, reabilitasaun eskola, irigasaun no estrada.
Enkuantu programa ba Uma Naroman ba Povu (UNP) ba tinan-2024 laiha tanba bazea ba orientasaun hosi governu tanba presiza finaliza hotu atividade refere tinan 2022 no 2023 nian ne’ebé hamutuk uma 50-resin to’o agora seidauk finaliza.
Jornalista : Natalino Belo
Editór : Evaristo Soares Martins
