Autoridade Munisipál no PNTL Baucau diskute koordenasaun servisu
BAUCAU, 24 janeiru 2024 (TATOLI) – Autoridade Administrasaun Munisipál Baucau hamutuk ho komandu Polísia Nasionál Timor-Leste (PNTL) koordena hodi ko’alia kona-bá planu kooperasaun iha área seguransa.
Prezidente Autoridade Munisipál (PAM) Baucau, Veneranda Eurico Marques Lemos Martins, esplika, liuhosi vizita iha komandu munisípiu atu hametin komunikasaun nune’e garante seguransa ligadu programa prioridade preparasaun podér lokál no desentralizasaun administrativa iha futuru.
“Ami hakarak iha koordenasaun, komunikasaun no kolaborsaun di’ak ho defeza no seguransa atu bele mantein estabilidade iha Baucau,” Prezidente Autoridade Munisipál Baucau hateten iha Vila Nova, kuarta ne’e.
Eis deputada ne’e, argumenta, planu desentralizasaun administrativa no poder lokál sai serbisu prioridade ba estrutura munisipál tanba bazea ba programa nasionál IX Governu Konstitusionál ne’ebé sei implementa iha tinan 2027.
Tanba ne’e, autoridade munisipál sempre nakloke ba entidade hotu-hotu inklui PNTL no FALINTIL-FDTL nune’e bele garante defeza no seguransa atubele atinje povu nia moris di’ak iha futuru.
“Estabilidade ne’e importante,” Veneranda Lemos akresenta.
Autoridade Administrasaun Munisipál Baucau rejista preokupasaun hosi komandu PNTL Baucau relasiona ho fasilidade sira hanesan infraestrutura ba konstrusaun no reabilitasaun ba edifísiu eskuadra sira liuhosi planu asaun anuál iha orsamentu Planu Dezenvolvimentu Integradu Munisipál (PDIM).
Komandante PNTL munisipiu Baucau, Superintendente Xefe Antoninho Mauluta, hateten, liuhosi sorumutu refere loke komunikasaun ligadu ho asuntu seguransa hanesan kondisaun, difikuldade, planu PNTL iha futuru.
“Prontu atu serbisu hamutuk inklui ho komunidade sira nune’e garante seguransa iha munisípiu Baucau,” Superintendente Xefe Antoninho Mauluta hateten.
PNTL Baucau aprezenta kondisaun infraestrutura hanesan eskuadra Quelicai, Baguia, Laga no Vemasse ne’ebé presiza hadi’a inklui kazerna ba membru PNTL no konstrusaun edifísiu komandu Baucau tanba nu’udar rejionál iha área leste.
Jornalista : Natalino Belo
Editór : Evaristo Soares Martins
