HorEX Baucau husu Ministériu Saúde hadi’a odamatan Radiolojia
BAUCAU, 26 janeiru 2024 (TATOLI) – Ospitál Rejionál Eduardo Ximenes (HorEX, sigla portugés) husu Ministériu Saúde atu hadi’a odamatan sala Radiolojia tanba difikulta prosesu raiu-xís.
Diretór Apoia Diagnóstika HorEX Baucau, Francisco Armando, esplika, situsasaun refere difikulta prosesu raiu-xís durante fulan-neen ona nune’e HorEX Baucau hato’o ona pedidu proposta ba MS atu hadi’a odamatan refere iha tempu badak.
“Aat nanis ona nune’e iha fulan-agostu entaun ita lebele uza ona, ita hein iha tempu badak ministériu bele fó resposta atu halo tenderizasaun (konkursu públiku),” Xefe Departamentu Radiolojia hateten iha Vila Nova, sesta ne’e.
Konstrusaun odamatan refere utiliza tima tanba atu satan radiasi nune’e bainhira aat fó impkatu ba prosesu raiu-xís liuliu atu halo diagnóstika moras pasiente sira iha HorEX Baucau.
Situasaun ne’e obriga pasiente sira tenke transporta ba Ospiaál Nasionál Guido Valadares (HNGV, sigla portugés) antes halo kontinuasaun ba prosesu tratamentu saúde.
“Pasiente sira-ne’ebé hetan dezastre, me’ar iha indikasaun TBC entaun tenke ba Dili halo diagnóstika tiha mak foin kontinua tratamentu,” Francisco Armando akresenta.
HorEX Baucau rekoñese ho situasaun refere difikulta prosesu atendimentu ho lalais inklui prosesu transportasaun ba HNGV tarde tanba menus ambulánsia.
Maske nune’e, dirijente ospitál buka solusaun hanesan halo kontaktu ho ambulánsia liuhosi tulun hosi munisípiu sira nune’e fasilita prosesu transportasaun pasiente ba nasionál.
HorEX Baucau durante ne’e transporta ona pasiente hamutuk na’in-50 resin ba HNGV atu halo raiu-xís komposta hosi pasiente asidente, TBC no moras laran.
Jornalista : Natalino Belo
Editór : Evaristo Soares Martins
