DILI, 26 janeiru 2024 (TATOLI) – Ministériu Obras Públika (MOP) liuhosi Sekretária Estadu Eletrisidade Agua no Saneamentu (SEEAS), Santos Noronha, konvoka enkontru ho liña ministeriál sira no setór privadu hotu hodi konsulta ba planu mestre dezeñu drainajen iha kapitál ho objetivu atu prevene hosi risku dezastre naturál.
Timor-Leste, normalmente akontese udan ho intensidade boot, afeta ba inundasaun iha Dili, iha zona Caicoli, Balide no fatin sira seluk hodi rezulta dezastre natural, tanba ne’e, MOP inisia konsulta planu mestre ida-ne’e hodi dezeña drenajen iha Dili atu prevene Dili hosi risku ba dezastre.
Iha prosesu konsulta ne’e, envolve mós hosi ministériu balun hanesan Sekretaria Estadu ba Asuntu Toponomia Organizasaun Urbana (SETOU), Sekretaria Estadu Terras Propriadade (SETP), Autoridade Munisípiu Dili no setór privadu tanba projetu ida-ne’e nu’udar projetu integradu.
“Ohin ne’e ita konsulta ba planu mestre atu halo dezeñu hodi konstrui drainajen iha Dili, tanba ita bo’ot sira hatene kuandu udan, iha Dili sempre mosu indunsasaun iha fatin-fatin”, Santo Noronha ba jornalista TATOLI iha salaun MOP Caicoli, sesta ne’e.
Tanba ne’e, Ministériu Obras Públika iha obrigasaun hodi foti responsablidade hodi konsulta halo dezeñu ne’ebé ho kualidade.
“Orsamentu ba projetu ida-ne’e ami seidauk define kustu hira tanba ami halo hela konsulta hafoin ida-ne’e ami sei tún ba terenu atu halo identifikasaun ba fatin sira ne’ebé risku ba inundasaun para aban bain rua ita konstrui drainajen sira ne’e karik bele lao di’ak. Nune’e prevene inundasaun iha Dili. Agora ita sei konsulta no nia implementasaun sei halo tempu badak”, nia afirma.
MOP sei halo identifikasaun hotu hafoin loke konkursu atu empreza sira bele konkore.
“Ami halo tiha identifikasaun ba fatin sira-ne’e hotu, hafoin ida-ne’e mak ami foin loke konkursu atu fo oportunidade ba empreza atu halo konstrusaun ba drainajen iha Dili”, nia adianta.
Tékniku hosi Sekretária Estadu Eletrisidade Agua no Saneamentu (SEEAS), João Piedade, realsa katak planu mestre ba drainajen iha Dili, hahú hosi I Governu to’o III, iha ona no iha IV Governu Konstituisionál kontinua fila fali planu ne’e no iha IX Governu hahú halo fali konsulta hodi haree dezeñu ba drainajen iha Dili.
Nia dehan, iha Dili fahe ba parte tolu mak Dili Oeste, Dili Leste no Dili Sentrál, maibé tuir identifikasaun ne’ebé ekipa tékniku sira halo, Dili Sentrál mak sai hanesan fatin risku ba inundasaun.
Nia hatutan, iha kapital ne’e, área Caicoli, uluk hanesan Lagoa, sé bele karik iha planu mestre ida hodi normaliza fatin Lagoa bele iha bee dalan atu liu.
Nia husu ba komunidade sira atu kontribui ba dezenvolvimentu drainajen ne’ebé Governu halo iha kapitál Dili.
Iha fatin hanesan, Sekretária Estadu Terras Propriadade (SETP), Jaime Xavier, hateten hosi SEPT prontu koopera bainhira MOP implemta obra projetu drainajen iha Dili.
“Ami-nia tékniku sira prontu bainhira projetu konstrusaun drainajen iha Dili la’o, ami prontu apoiu”, nia dehan.
Nune’e mós, Sekretáriu Estadu Toponímia Organizasaun Urbanu (SETOU), Jermano Santa Brites, husu ba komunidade sira atu koopera ho Governu nian planu ne’ebé atu harii drainajen iha Dili. Tanba Dili, iha fatin barak mak sai hanesan risku ba inundasaun.
“Husu ba komunidade atu koopera ho Governu, tempu ona ita hadia no dezenvolve kapitál Dili atu sai di’ak liután”, nia afirma.
Prezidente Autoridade Munisipál Dili, Guilhermina Filomena Saldanha Ribeiro, hateten ekipa Prezidente Autoridade Munisípiu prontu koopera no apoiu ekipa integadu ne’ebé lideradu hosi MOP ba implementasaun projetu konstrusaun drainajen iha Dili, atu projetu ida-ne’e bele la’o di’ak.
“Ita tenke halo duni ida-nee para foti sidade Dili nia oin sai kapitál nasaun nia”, nia konklui.
Jornalista: Natalino Costa
Editór : Zezito Silva
