DILI, 29 janeiru 2024 (TATOLI)–Primeiru-Ministru (PM), Kay Rala Xanana Gusmão, segunda ne’e, simu estudante japonés na’in-neen ne’ebé mai vizita Timor-Leste liuhosi programa JENESYS 2023 Dispatching programme.
Biban ne’e, Xanana Gusmão husu ba estudante sira atu apreende liután kona-ba kultura Timor-Leste no kria amizade forte ho foin-sa’e timor-oan sira.
“Benvidu mai Timor. Ami agradese tebes ba vizita hodi mai koñese ami-nia rai liuhosi atividade hanesan ne’e hodi hanoin di’ak ho juventude sira no hosi Timor-Leste mós ba Japaun hodi koñese malu ho di’ak liután iha área oin-oin,” Xefe Governu hateten hafoin ramata sorumutuk ho estudante japonés sira, iha Gabinete Fronteira Marrítima no Terrestre, iha Palásiu Governu.
Notísia relevante : Timor-Leste-Japaun kontinua hametin kooperasaun iha programa JENESYS
Durante hasoru malu ho Xefe Governu, estudante hirak ne’e tuir planu entrega osan doasaun ne’ebé sira rasik fa’an kafé Timor iha Kōchi Prefecture (Japaun) ba Primeiru-Ministru hodi entrega Madre Dominikana sira-nia orfanato iha Bidau Mota Klaran, maibé PM Xanana sujere estudante sira ne’e entrega direta.
Iha biban ne’e, Xefe Governu hato’o apresiasaun hodi tara tais nu’udar sinál amizade ba estudante hirak ne’e. Estudante hirak ne’e akompaña hosi Embaixadór Japaun iha Timor-Leste, Tetsuya Kimura.
Estudante sira vizita Timor-Leste iha loron 24 janeiru 2024, ne’ebé antes ne’e vizita ona Eskola Sekundária rua hanesan Sta. Madalena de Canossa no St. Inacio de Loyola iha Liquiçá hodi halo interkámbiu ho estudante sira iha eskola rua refere, no segunda (29/01) sira fila hikas bá Japaun.
Estudante timor-oan kada tinan hetan konvite hodi bá vizita Japaun liuhosi programa JENESYS liuhosi tema oin-oin.
Jornalista : Antónia Gusmão
Editora : Julia Chatarina
