BAUCAU, 29 janeiru 2024 (TATOLI) – Autoridade suku Buruma hahú hikas atividade Uma Naroman ba Povu (UNP) faze daruak liuhosi Programa Nasionál Dezenvolvimentu Suku (PNDS).
Xefe suku Buruma, postu admistrativu Baucau Vila, Libório dos Santos Freitas, esplika, prosesu konstrusaun ba uma-sia durante ne’e paradu tanba desizaun hosi governu inklui fallansu balun hosi tékniku PNDS nune’e atividade refere hahú fali iha fulan-dezembru tinan-2023.
“Ami foin lalais mak hahú fali iha fulan kotuk, agora mak iha sinta jerál ,” Xefe suku Buruma informa ba Agência TATOLI iha Vila Antiga, segunda ne’e.
Benefisiáriu ba UNP faze daruak hamutuk nain-sia kompostu hosi feto faluk, oan kiak no ema ho defisiénsia ne’ebé kada aldeia ema na’in-tolu hanesan aldeia Tasi, Suli-Ua no Ono-Sere.
Hosi uma-sia refere komposta hosi uma-haat mak ho medida 54 m² no uma-lima mak medida 61 m² ho totál orsamentu hamutuk $159.318 hodi finansia ba kustu infraestrutura $153.306 no kustu administrasaun hamutuk $6.012.
“Tarjetu fulan-tolu, ita hakarak iha fulan-fevereiru bele entrega ona,” Libório Freitas akresenta.
Suku Buruma hamutuk aldeia haat kompostu Tasi, Suli-Ua, Casamutu no Ono-Sere ho totál populasaun 3.245.
Jornalista : Natalino Belo
Editór : Evaristo Soares Martins
