PNTL Baucau sei destaka membru kada eskola
BAUCAU, 30 janeiru 2024 (TATOLI) – Komandu Polísia Nasionál Timor-Leste (PNTL) munisípiu Baucau planeia instala postu seguransa iha kada eskola liuhosi Ofisiál Polísia Eskola (OPE) hodi kontrola estudante sira.
Komandante PNTL munisípiu Baucau, Superintendente Xefe Antoninho Mauluta, esplika, desizaun refere bazea ba Komandu Jerál ne’ebé preve ona iha planu programa anuál tinan-2024 no hein alokasaun orsamentu nune’e bele kontrola estudante sira iha kada eskola iha territóriu nasionál inklui munisípiu Baucau.
“Bainhira rekursu umanu sufisiente ita sei instala, eskola sira sei destaka OPE hahú hosi dadeer too eskola remata,” Komandante PNTL munisípiu Baucau hateten iha Vila Nova, tersa ne’e.
Superintendente Xefe Antoninho Mauluta, argumenta, planu refere sei diskute iha Komandante PNTL nasionál liuliu ligadu alokasaun orsamentu no halo kalkulasaun ba rekursu umanu ne’ebé presiza destaka ba iha kada eskola sira.
PNTL Baucau konsidera liuhosi maneira refere sei kontribui ba estabilidade seguransa liuliu kontrola estudante sira-ne’ebé sempre halo konfrontu entre eskola no fó impaktu ba dezestabiliza seguransa iha munisípiu Baucau.
“Ami sei koordena ho edukasaun no bainhira autoriza, liuhosi partilla hetan estudante sira-ne’ebé uza farda mak la ba tama ami sei tula ba eskola tanba iha poténsia hamosu problema,” Superintendente xefi Antoninho Mauluta argumenta.
Programa seluk mak PNTL sei halo atividade hanesan vizita ba kada eskola no estudante sira sei vizita mos komandu PNTL munisípiu nune’e bele fahe informasaun sira kona-bá serbisu PNTL nian ligadu ho prevensaun inklui atuasaun konflitu.
Alende ne’e, PNTL rasik sei ativa hikas estrutura tolu ne’ebé paradu iha tinan-2019 hanesan Konsellu Seguransa Munisipál (KSM lideradu Prezidenti Autoridade no Vise KSM lidera hosi Komandante PNTLBaucau.
Konsellu Seguransa Postu administrativu (KSPA) lidera hosi administradór postu admistrativu no vise hosi Komandante eskuadra no Konsellu Seguransa Suku (KPK) lidera hosi xefi suku no vise hosi Ofisiál Polísia Suku (OPS).
Objetivu hosi reativa konsellu tolu refere tanba hakarak atu iha koordenasaun komunikasaun no komunika di’ak liután ho autoridade munisipál, postu no suku nune’e bele prevene situasaun iha Baucau.
“Ita tenke serbisu hamutuk atu nune’e situasaun iha Baucau bele hakmatek,” Superintendente Xefe Antoninho Mauluta akresenta.
PNTL Baucau rejista membru hamutuk 176 ne’ebé destaka iha komandu, eskuadra PNTL iha postu administrativu neen inklui iha kada suku liuhosi Ofisiál Polísia Suku (OPS).
Jornalista : Natalino Belo
Editór : Evaristo Soares Martins
