Veneranda Lemos husu Autoridade lokál hamutuk kria pás iha Baucau
BAUCAU, 31 janeiru 2024 (TATOLI) – Prezidente Autoridade Munisipál (PAM) Baucau, Veneranda Eurico Marques Lemos Martins husu entidade hotu liuliu autoridade lokál atu hamutuk kontribui ba pás iha Baucau.
Prezidente Autoridade Munisipál (PAM) Baucau, Veneranda Lemos, esplika, situasaun seguransa sai prekupasaun no responsabilidade hosi entidade hotu inklui komunidade sira tanba mosu lamentasaun hanesan sempre mosu konflitu hodi dezestabiliza situasaun inklui hafoer imajen Baucau iha Timor-Leste.
“Responsablidade ida-ne’e mak husik leet de’it entaun ita atu lori ita-nia rai Baucau ba ne’ebé ,” Prezidente Autoridade Munisipál Baucau hateten iha Vila Nova, kuarta ne’e.
Eis Deputada ne’e argumenta, liuhosi Enkontru entre entidade sira presiZa kontinua no fazeadamente nune’e hametin liña koordenasaun no komunikasaun ho objetivu garante seguransa ba komunidade iha munisípiu Baucau.
Autoridade Baucau konsidera mesmu iha diferensa hodi hamosu diverjénsia ba malu tanba kór polítiku maibé labele sai barreira atu fahe malu liuliu labele la’o ba malu tanba de’it odiu liuliu entre grupu arte-marsiál.
“Ha’u agora hanesan autoridade hakarak atu oinsá hotu-hotu fó hanoin hamutuk atu sai hosi situasaun ida-ne’e,” Veneranda Lemos akresenta.
Veneranda Lemos garante liuhosi enkontru refere ho veteranu, sosiedade sivíl no autoridade lokál sei kontribui ba pás no estabilidade nune’e bele lori hikas imajen nu’udar sidade daruak no dezenvolvimentu bele atinje Baucau.
Xefi suku Caibada, postu Baucau Vila, Cosme da Costa Lopes, apresia ho inisiativa autoridade munisipál ne’ebé halibur entidade hotu-hotu tanba preokupa ho estabilidade seguransa iha Baucau.
“Prontu kontribui ba pás no estabilidade liuliu iha suku Caibada nune’e situasaun hakmatek no lori dezenvolvimentu mai iha Baucau,” Cosme Lopes argumenta.
Enkontru ho tópiku kona-ba garante estabilidade iha munisípiu Baucau partisipa hosi Polísia Nasionál Timor-Leste (PNTL), FALINTIL-FDTL komponente terestre, veteranu, sosiedade Sivil, xefe suku, administradór postu administrativu, konviksaun relijioza no Autoridade administrasaun munisipál.
Jornalista : Natalino Belo
Editór : Evaristo Soares Martins
