Xefe suku Gariuai la autoriza halo kobransa visa família ba komunidade
BAUCAU, 31 janeiru 2024 (TATOLI) – Autoridade suku Gariuai, postu administrativu Baucau Vila deside ona liuhosi enkontru konsellu suku atu la halo kobransa ba komunidade liuliu atualiza dadus visa família.
Xefi suku Gariuai, postu Baucau Vila, Arlindo Belo Freitas, esplika, liuhosi enkontru konsellu suku ne’ebé realiza kada fulan deside ona atu atualiza dadus komunidade hanesan rejistu liuhosi visa família maibe la autoriza atu halo kobransa.
“Ha’u la orienta atu xefe aldeia no delegadu sira atu halo kobransa ba komunidade,” Xefi suku Gariuai hateten iha Vila Nova, kuarta ne’e.
Autoridade suku hetan keisa hosi komunidade aldeia Bahamori tanba kada uma-kain ne’ebé atualiza dadus liuhosi visa família ho montante $1 nune’e mosu protesta hosi komunidade iha aldeia refere.
Enkuantu desizaun atualiza dadus tanba iha suku Gariuai mosu naran dupla hanesan sidadaun solteiru ne’ebé antes ne’e seidauk forma família kontiua sai membru família no aumeta iha visa família foun.
Situasaun ne’e presiza atualiza maibé liuhosi kada aldeia nune’e bainhira to’o iha suku halo baze dadus hodi hatene totál komunidade no uma-kain tuir idak-idak nia aldeia.
“Husu komunidade informa mai xefe suku bainhira mosu kobransa ruma,” Arlindo Freitas hateten.
Autoridade suku liuhosi enkontru fo xamada ona ba xefi aldeia Bahamori no husu atu devolve hikas komunidade nia osan tanba laiha orientasaun kona-ba kobransa nune’e bainhira la implementa sei prosesa tuir dalan legál nune’e iha responsabilidade ba aktu refere.
“Ha’u xamada ona no ha’u husu atu devolve fali komunidade nia osan,” Arlindo Freitas akresenta.
Suku Gariuai hamutuk aldeia ualu kompostu aldeia Gariuai, Uaturau, Maucale, Cailiri, Uaibe-ana, Uatu-wa, Bahamori no Darasula ho totál populasaun 6.030 hosi uma-kain rihun rua-resin
Jornalista : Natalino Belo
Editór : Evaristo Soares Martins
