BAUCAU, 02 fevereiru 2024 (TATOLI) – Serbisu Munisipál Agrikultura Baucau tinan ne’e distribui fini hare bá agrikultór iha munisípiu Baucau.
Responsável Produsaun Alimentár Serbisu Munisipál Agrikultura Baucau, Leonor de Almeida Araújo, esplika, fini hare ba époka tinan ne’e sufisiente, ne’ebé fahe ba postu neen hanesan Vemasse, Baguia, Laga, Quelicai, Vemasse no Baucau Vila.
“Fini ne’e tipu nakroma ne’ebé kada tinan governu aloka hodi distribui ba komunidade,” Responsável Produsaun Alimentár Agrikultura Baucau hateten iha Vila Nova, sesta ne’e.
Durante prosesu distribuisaun Agrikultura Baucau hasoru difikuldade iha transporte, maske hetan ajuda hosi parseiru dezenvolvimentu liuhosi maibé ho kuantidade kiik no ba área ne’ebé implementa programa ba nune’e afeta ba prosesu distribuisaun fini ba komunidade.
Leonor Araújo husu Ministériu Agrikultura atu aloka transporte hodi halo distribuisaun tanba orsamentu hosi Administrasaun Munisipál seidauk sufisiente hodi aluga transporte hodi distribui fini ba komunidade.
“Fini iha maibé atu distribui hasoru difikuldade iha parte transporte,” Leonor Araújo akresenta.
Governu liuhosi Ministériu Agrikultura, Peska, Pekuária no Florestrál (MAPPF) kada tinan distribui fini hosi nasionál no munisípiu halo jestaun hodi kontribui fahe ba komunidade ne’ebé iha natar kompostu hosi irrigasaun blutu iha Vemasse, Sobabere postu Baguia inklui área seluk tan.
Fini hare ne’e sei distribui ba postu Venilale hamutuk tonelada 3.5, Quelicai 3.2, Vemasse 6, Baguia 3.5, Laga 4.3 no Baucau Vila tonelada 7.5.
Jornalista : Natalino Belo
Editór : Evaristo Soares Martins
