Autoridade suku Tirilolo husu komunidade atualiza dadus
BAUCAU, 01 janeiru 2024 (TATOLI) – Autoridade suku Tirilolo, postu Baucau Vila husu komunidade sira atu atualiza visa família hodi ajusta baze dadus iha suku.
Xefe aldeia Betulale, Hermes Belo, esplika, razaun atualiza dadus suku tanba bazea ba orientasaun Ministériu Admistrasaun Estatal (MAE) liuhosi Autoridade Munisipál nune’e bele hatene totál uma-kain no populasaun iha kada aldeia iha suku Tirilolo.
“Ida-ne’e programa governu nian, ita atualiza nune’e hatama ba sistema,” Xefe aldeia Betulale informa ba Agência TATOLI iha Vila Antiga, segunda ne’e.
Autoriadade suku halo ona esforsu liuhosi fahe informasaun ba komunidade maibé maioria seidauk informadu nune’e to’o agora prosesu atualizasaun visa família seidauk finaliza.
Alende ne’e, blanco limitadu nune’e parte autoridade foti inisiativa aumenta ho maneira fotokópia no sei muda numéru rejistrasaun tanba ne’e komunidade sei presiza kontribui orsamentu ho montante $1.
Prosesu atualizasaun refere autoridade suku seidauk determina tempu no kontinua husu komunidade atu kontribui halo atualiza dadus hodi hein Pesoál Apoia Suku (PAS) foun hetan kontratu.
“Ita la fó limitasaun tempu, importante mai atualiza,” Hermes Belo akresenta.
Tuir dadus tinan 2023, komunidade iha aldeia Betulale hamutuk 2.980 maibé inísiu to’o agora foin uma-kain 670 mak halo renovasaun ba visa família foun inklui aldeia Lutumutu ne’ebé seidauk finaliza, enkuantu aldeia haat seluk hahú finaliza ona no hein input ba sistema electrónika.
Suku Tirilolo hamutuk aldeia neen kompostu hosi Betulale, Lutumutu, Lialailesu, Parlamentu, Caisido no Osso-ua ho totál populasaun 9.789.
Jornalista : Natalino Belo
Editór : Evaristo Soares Martins
