DILI, 02 fevereiru 2024 (TATOLI) – Prezidente Autoridade Turizmu iha Timor-Leste, Virgilio Smith, dehan ekipa tékniku identifika no halo ona levantamentu ba poténsia turístika iha Munisípiu Lautem, Ainaro, Bobonaro no Dili ho objetivu atu dezenvolve sítiu turístiku.
“Bainhira ami simu mandatu iha 2023, ami-nia ekipa tékniku sira tun ba munisípiu haat hodi haree área turístika sira hodi identifika infraestutura turístika sira ne’ebé mak bele atrai vizitante sira iha fatin ne’eba mak Lautem, Ainaro, Bobonaro no Dili”, Virgilio Smith informa iha nia kna’ar fatin Fatuhada, ohin.
Nia dehan, Governu identifika ona sítiu turístika sira atu ajuda hodi prepara planu mestre ba setór turizmu nia ho objetivu atu dezenvolve setór turizmu iha TL.
“Bainhira ita atu kualifika infraestutura turístika sira mak tenke dezenvolve di’ak liután sitiu turístiku sira iha ita-nia rain”, nia hateten.
Nia subliña, problema boot liu mak infraestutura bázika liuliu estrada, liña komunikasaun no ospitalidade nian hanesan restaurante no otél sira. Hafoin rezolve problema hirak ne’e, ministériu sei disponibiliza formasaun ba rekursu umanu hodi prepara ba atendimentu públiku.
Governu sei dezenvolve poténsia turístika ho objetivu atu atrai turista sira no investór sira ba setór turizmu hosi rai-liur no emprezáriu sira ne’ebé iha interese ba referidu setór.
“Ita iha planu di’ak maibé tenke iha orsamentu sufisiente hodi halo atividade turístika sira-ne’e iha rai-laran maibé se tinan ida-ne’e mak la konsege mak ita sei halo iha tinan oin”, nia dehan.
Orsamentu Jerál Estadu (OJE) 2024, husi Diresaun Turizmu no Ambiente ne’ebé aloka ba Autoridade Turizmu Timor-Leste ho montante $ 500.000.
parte seluk, espesialista iha área Turismu, Manuel Vong, husu ba Autoridade Turístiku atu implementa polítika Governu nian hodi dezenvolve setór turizmu iha Timor-Leste hodi lori benifisiu ekonómiku, sosiál kulturál ba nasaun ida-ne’e.
“Autoridade Turístiku sira-nia papel ida ne’ebé mak importante tebes atu bele tulun hodi organiza no implementa polítika Governu ba dezenvovimentu setór turizmu mak tenke hadia infraestrutura sira, atendimentu sira nune’e lori benifisiu ekonómiku, sosiál no kulturál iha nasaun ida-ne’e”, Manuel Vong informa iha nia kna’ar fatin iha Universidade Dili Instituteof Tecnology (DIT) ohin.
Jornalista : Felicidade Ximenes
Editór : Zezito Silva
