SEEAS orienta ekipa tékniku halo levantamentu ba fatin konstrusaun drainajen

DILI, 05 fevereiru 2024 (TATOLI) – Sekretáriu Estadu Eletrisidade Agua no Saneamentu (SEEAS), Santos Noronha, orienta ona ekipa tékniku atu ba terenu hodi halo levantamentu ba fatin sira ne’ebé mak atu halo konstrusaun drainajen.

“Foin daudaun komesa halo ona konsulta públika ba dezeñu atu harii drainajen iha Dili, ne’ebé envolve mós liña ministeriál balun, autoridade munisípiu Dili no ita-nia setór privadu sira. Objetivu ida-ne’e mak atu prevene inundasaun Dili. Agora ekipa tékniku sira tun ona terenu atu halo levantamentu ba fatin sira ne’ebé ita sei konstrui drainajen”, Santos Noronha hateten ba TATOLI iha kna’ar fatin Caicoli, Segunda, ohin.

Nia dehan, área Caicoli, Balide no fatin balun konsidera hamosu inundasaun bainhira udan bo’ot, tanba ne’e, ekipa SEEAS halo ona identifikasaun ba fatin sira, atu bele konstrui drainajen hodi prevene inundasaun.

“Ami-nia ekipa kuandu remata tiha levantamentu ne’e sei submete mai ha’u no ha’u sei submete relatóriu ne’e ba Ministru Obra Públika no ami rua sei diskute, tanba atu halo oinsá ne’e desizaun ministru mak sei foti”, nia adianta.

Santos hateten, kuandu ministru foti ona desizaun mak faze tuir sei avansa ba iha dezeñu.

“Kuandu ministru foti ona desizaun mak ita sei avansa ba iha dezeñu ba drainajen no tuir mai ita sei loke konkursu ba ida-ne’e hodi ita hahú halo konstrusaun drainajen iha Dili”, nia konklui.

Jornalista: Natalino Costa

Editór : Zezito Silva