iklan

EKONOMIA, HEADLINE

Governu reabilita ”em breve” Jardim Cristo Rei no João Paulo II

Governu reabilita ”em breve” Jardim Cristo Rei no João Paulo II

Estátua João Paulo II. Imajen/Dok.Antonio Gonçalves

DILI, 06 fevereiru 2024 (TATOLI) – Ministériu Turismu no Ambiente liuhosi Diresaun Nasionál Dezenvolvimentu Turístiku, iha tinan ne’e, reabilita Jardim Cristo Rei ho João Paulo II Tasi-Tolu ho orsamentu rihun 100.

”Agora daudaun, ita hatene katak iha 2024, ami halo planu hodi kontinua halo reabilitasaun ba Jardim Cristo Rei no João Paulo II Tasi Tolu”, Diretora Nasionál Dezenvolvimentu Turístika iha Ministériu Turismu no Ambiente Rosita Garcia informa iha nia kna’ar fatin Sentru Konvensaun Dili (CCD, sigla portugés), ohin.

Hafoin reabilita Jardim Cristo Rei ho João Paulo II mak Governu sei kontinua harii jardim Munisípiu Lautem, Postu Tutuala (Valu-Sere, reabilita pouzada), ho Praia Kaitehu Liquiça.

”Ami mós harii jardim iha Munisípiu Lautem hanesan Valu-Sere no Praia Kaitehu Liquiça depois ami reabilita pouzada sira hanesan Liquisa, Manufahi, Maubesi no Lautem tutuala, entaun pakote haat ida-ne’e inkkui edifísiu antigu portugés nian, ami preeve orsamentu hamtuk 900 mil”, nia afirma.

Iha fatin hanesan, Xefe Departamentu Dezenvolvimentu Turismu, Arnaldo Freitas, akresenta atividade ne’ebé mak halo iha 2024 mak sei harii tan jardim ba sítiu Valu-Sere iha Jaco no reabilita pauzada sira.

“Tinan 2024, ami harii jardim sítiu Valu-Sere iha Jaco no reabilita pauzada sira, tanba osan ba ida-ne’e prevee ona, nunee tinan ida-ne’e ami hahú halo, tanba dezeñu ami kompleta hotu ona. Agora Kaitehu Liquiça ne’e hetan ona aprovasaun no hein de’it prosesu konkursu”, Arnaldo Freitas afirma.

Antes ne’e, Prezidente Autoridade Turismu iha Timor-Leste, Virgílio Smith, dehan ekipa tékniku identifika no halo ona levantamentu ba poténsia turístika iha Munisípiu Lautem, Ainaro, Bobonaro no Dili ho objetivu atu dezenvolve sítiu turístiku.

Rekorda fali katak Governu reabilita ona, iha 2023, jardim hitu iha Dili hanesan Jardim 5 de maio, Largo Lecidere, Farol iha Pálasiu Governu oin, jardim babadok iha Mandarin no Motael 12 de Novembro.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!