Komunidade hetan ona sidadaun ne’ebé lafaek tata iha área Maubai
BAUCAU, 06 fevereiru 2024 (TATOLI) – Komunidade no família tersa ne’e, hetan ona sisadaun Francisco da Costa Belo nia isin mate iha área Maubai, suku Buruma, postu administrativu Baucau Vila hafoin loron-tolu lafaek tata iha área Alae-ana, Caisido, Tirilolo.
Tuir kronolojia, vítima Francisco Belo hamutuk ho nia kolega na’in-tolu ba luku tasi buka ikan iha área Asalae-ana iha loron-sábadu, 03 fevereiru no iha kalan oras 01:00 mosu akontesimentu lafaek tata no lori lakon, foin hetan fali ain sorin karuk iha área Maubai, suku Tirilolo.
Xefe suku Tirilolo, Elvino Belo, esplika, sidadaun ne’e hetan ohin purvolta oras 09:00 no direita transporta ba Ospitál Rejionál Eduardo Ximenes (HorEX, sigla portugés) hodi halo identifikasaun.
“Hetan ona iha Maubai no ita hamutuk ho família deside lori ba haloot tanba kelur ona,” Xefe suku Tirilolo informa ba Agência TATOLI liuhosi telefónika, tersa ne’e.
Hahú inísiu simu informasaun vítima lakon, parte autoridade suku hamutuk ho família halo kontaktu kedas ba parte Autoridade Protesaun Sivil (APC, sigla portugés) no komandu Polísia Nasionál Timor-Leste Baucau hodi buka tuir durante loron-tolu iha área tasi parte Cairavela, postu Vemasse to’o Maubai, Buruma.
Elvino Belo, husu ba komunidade iha área tasi liuliu Tirilolo oan atu halao atividade peska ho kuidadu tanba iha área refere lafaek barak no sai ameasa ba komunidade.
“Husu komunidade atu kuidadu aan bainhira luku tasi,” Elvino Belo akresenta.
Vítima Francisco da Costa Belo ho idade 35 hosi aldeia Caisido, suku Tirilolo nu’udar agrikultór no peskadór.
Jornalista : Natalino Belo
Editór : Evaristo Soares Martins
