UNP faze daruak iha Samalari sei finaliza iha fulan-abríl
BAUCAU, 07 fevereiru 2024 (TATOLI) – Prosesu konstrusaun Uma Naroman ba Povu (UNP) faze daruak iha suku Samalari, postu administrativu Baucau Vila sei finaliza iha fulan-abríl tinan ne’e.
Xefi suku Samalari, Rui Magno Siqueira, esplika, hafoin paradu prosesu konstrusaun uma hirak-ne’e kontinua hikas no atinje ona pursentu 90 nune’e parte autoridade suku kontinua kontrola no husu tékniku sira aselera serbisu tanba konsidera prosesu konstrusaun tarde liu ona.
“Kuaze konklui ona, ha’u garante iha fulan-abríl ita bele finaliza ona,” Xefi suku Samalari informa ba Agência TATOLI iha Vila Nova, kuarta ne’e.
Uma-sia ho medida 56m² ne’ebé kada benefisiáriu sei hetan kuartu tolu, dapur no sintina ne’ebé projetu ne’e implementa liuhosi orsamentu jerál estadu tinan 2022 maibé la konsege finaliza tanba mudansa governasaun inklui klima.
Benefisiáriu ba UNP faze daruak ne’e mai hosi aldeia tolu hanesan Osoluga, Samalari no Sorulai ho totál orsamentu hamutuk $159.318 hodi finansia ba kustu infraestrutura $153.306 no kustu admistrasaun hamutuk $6.012.
Suku Samalari hamutuk aldeia haat kompostu hosi Solurai, Festau, Samalari no Ossoluga ho totál populasaun 3.187 hosi uma-kain 681.
Jornalista : Natalino Belo
Editór : Evaristo Soares Martins
