iklan

BAUCAU, HEADLINE, MUNISÍPIU, SEGURANSA

Membru 68 hosi Komponente Terrestre Baucau hetan promosaun diviza

Membru 68 hosi Komponente Terrestre Baucau hetan promosaun diviza

Membru F-FDTL Komponente Terrestre na'in-68 hetan promosaun diviza iha Lanud Baucau, kinta (08/02). Imajen Agência TATOLI/Natalino Belo.

BAUCAU, 08 fevereiru 2024 (TATOLI) – Membru na’in-68 hosi Komponente Terrestre hosi FALINTIL-Forsa Defeza Timor-Leste (F-FDTL) hamutuk na’in-68, kinta ne’e hetan promosaun diviza iha Baucau.

Komandante Komponente Terrestre, Koronél Domingos da Costa Soares “Dobu”, esplika, loron ohin marka istória ba komponente terestre, espesialmente ba membru na’in-68 ne’ebé ohin promove diviza nu’udar parte kontinuasaun selebrasaun loron transformasaun FALINTIL ba FDTL iha loron 02 fevereiru liubá.

“Ba promosaun ida-ne’e atu impoin sira-nia responsabilidade liuhosi dedikasaun, abnegasaun no disiplina iha serbisu,” Komandante Komponente Terrestre no Komandante Operasaun Espesiál hateten iha Lanud Baucau, kinta ne’e.

Membru F-FDTL Komponente Terrestre na’in-68 hetan promosaun diviza iha Lanud Baucau, kinta (08/02). Imajen Agência TATOLI/Natalino Belo.

Hosi totál númeru refere membru ne’ebé promove diviza ba ofisiál hanesan promosaun kapitaun hamutuk na’in-neen, postu alferes na’in-hitu, postu sarjentu na’in-tolu no postu primeiru kabu hamutuk na’in-52.

Promosaun refere bazea mós ba progresu FALINTIL-FDTL no esforsu ba dezenvolvimentu nasaun inklui asisténsia mediku liuhosi programa saúde no sosiál.

“Ita hakarak aposta iha Forsa Armanda ne’ebé orientadu ba rezultadu,” Koronél Domingos da Costa Soares akresenta.

Koronél Domingos da Costa Soares agradese ba membru promovidu hotu ne’ebé fo-aan hodi dedika no lealidade ba instituisaun F-FDTL espesiál liu ba komponente terestre.

Alende ne’e, Komponente Terrestre agradese ba parseiru hotu hanesan Ospitál Rejionál Eduardo Ximenes (HorEX, sigla portugés), Saneamentu, Autoridade Munisipál Baucau, autoridade lokál no família hotu ne’ebé sempre apoia no pasiénsia durante ezisténsia F-FDTL.

Desizaun promosaun diviza bazea ba depaxu Kuartél Jerál F-FDTL númeru 007 no 008/ Xefe Estadu Maiór Forsa Armada tinan 2024 ne’ebé bazea ba Dekretu-Lei númeru 33/2020, 2 Setembru, kona-bá Estatutu Foun bá Militár F-FDTL.

Artigu 3 hosi Dekretu-Lei ne’e hateten, promosaun ne’e pur diuturnidade bá postu tenente, primeiru sarjentu no segundu-kabu ka primeiru mariñeiru iha militár ho tinan tolu postu ho forma graduál liuhosi vaga no respeita bá antiguidade ne’ebé previstu iha Estatutu.

Jornalista   : Natalino Belo

Editór         : Evaristo Soares Martins

iklan
iklan

Leave a Reply

iklan
error: Content is protected !!