iklan

EDUKASAUN, DILI, HEADLINE

ME planeia integra dokumentu Fraternidade Umana ba kurríkulu nasionál

ME planeia integra dokumentu Fraternidade Umana ba kurríkulu nasionál

Prezidente Repúblika, Jose Ramos-Horta, hala'o enkontru ho Ministra Edukasaun Dulce de Jesus Soares, iha Palásiu Prezidensiál Nicolau Lobato, Bairru Pite, Dili, sexta (09/02). Imajen Tatoli/Egas Cristovão.

DILI, 09 fevereiru 2024 (TATOLI) – Ministra Edukasaun, Dulce de Jesus, hateten iha tinan ne’e, integra ona dokumentu Fraternidade Umana ba kurríkulu nasionál.

Governante ne’e hatete asuntu ne’e hafoin enkontru ho Prezidente Repúblika, José Ramos Horta, hodi simu orientasaun atu lidera prosesu dezaminasaun no integra dokumentu fraternidade umana ba kurríkulu.

Ministra Edukasaun, Dulce de Jesus Soares. Imajen Tatoli/Egas Cristovão.

“Daudaun ne’e iha faze revizaun kurríkulu ba terseiru sikulu, nune’e iha tinan ida ne’e, ita hatama ona dokumentu  fraternidade umana ba iha kurríkulu. Tanba ne’e ami sei servisu ho Gabinete Prezidente Repúblika atu garante dokumentu ne’e sai simples hodi mestre no estudante sira bele utiliza,” Ministra Edukasaun hateten iha Palásiu Prezidente, Bairru Pité-Dili.

Tuir Ministra ne’e katak dokumentu fraternidade umana iha vantajen boot ba edukasaun, nune’e mak Parlamentu Nasionál hasa’i rezolusaun no konkorda adota dokumentu ne’e iha Timor-Leste.

“Dokumentu ne’e nia vantajen iha, ida ne’e mak Parlamentu hasai rezolusaun no parte hotu konkorda atu hatama iha ita nia kurríkuu edukasaun nune’e hanorin ba estudante sira,” konklui.

Alende ne’e, Xefe Estadu mós orienta ba Ministra Edukasaun atu lidera dezaminasaun ba dokumentu fraternidade umana ne’ebé hetan ona rezolusaun hosi Parlamentu Nasionál.

Rezolusaun Parlamentu Nasionál

Parlamentu Nasionál liuhosi reuniaun plenária extraordináriu aprova projetu rezolusaun PN númeru 93/V(4a), kona-ba Pás Mundiál, Fraternidade Umana no Koexisténsia Komun ho unanimidade ho rezultadu votasaun a-favór 60, kontra no abstensaun 0.

Projetu rezolusaun PN númeru 93/V(4a), kona-ba Pás Mundiál, Fraternidade Umana no Koexisténsia Komun ne’ebé Timor-Leste hanesan nasaun primeiru adota dokumentu ne’e.

Assembleia Jerál Nasaun Unida iha fulan-dezembru 2020 marka iha loron 04 fevereiru hanesan loron internasionál Fraternidade Umana, konsidera loron ne’ebé asina deklarasaun Abu Dhabi 04 fevereiru 2019 entre Santidade Papa Francisco ho Saserdote Musulmanu Al-Azhar, Ahmad Al- Tayyeb.

PN Timor-Leste mós louva konteúdu deklarasaun kona-ba fraternidade umana ba pás mundiál konvivénsia komun no konvite promosaun justisa, pás, direitu umanu no liberdade relijioza.

Kongratula esforsu dezenvolve relasaun internasionál pasífika hosi parte subskritór mensajen, konsiente diálogu, kompreensaun, difuzaun kultura toleránsia, aseitasaun konvivénsia entre ema umanu kontribui signifikante ba redusaun problema oioin hanesan ekonomia, sosiál, polítika no ambientál ba parte jéneru umanu.

Reafirma igualdade entre mane no feto ba rekuñesimentu direitu instrusaun ba servisu no exersísiu direitu polítiku, rekuñese pluralidade relijiaun no liberdade kredo, pensamentu, expresaun no asaun enkuantu pilár demokrátiku.

Valoriza vizaun relijiaun hanesan promotor ba pás, koñesimentu mutúo, fraternidade umana no konvivensia komun no perspetiva dezafiu komun koloka umanidade, pás, hahán, ki’ak, alterasaun klimátika, saúde públika, konsiente nesesidade resposta komun komunidade internasionál.

Toma konta situasaun polítika mundiál atuál ho pás, diálogu no respeitu direitu umanu, ho nune’e Parlamentu Nasionál deklara kompromisu ho valór pás diálogu respeitu direitu umanu no louva deklarasaun refere no ONU estabelese ona sai loron mundiál ba fraternidade umana.

Governu presiza halo promosaun valór fraternidade umana iha planu internu liuhosi medida konkreta hodi mellora bem-estar sidadaun Timor-Leste, nível multilateral, liuhosi doasaun protetora no promosaun konvivénsia pasífika entre povu.

Notísia Relevante: Ramos Horta-PPN ko’alia TL atu adota deklarasaun Pás Mundiál

Jornalista: Hortencio Sanchez

Editór         : Florencio Miranda Ximenes

iklan
iklan

Leave a Reply

iklan
error: Content is protected !!