iklan

BAUCAU, HEADLINE, MUNISÍPIU, SEGURANSA

Autoridade husu joven kria paz iha suku Caibada

Autoridade husu joven kria paz iha suku Caibada

Xefe suku Caibada, Cosme da Costa Lopes. Imajen Agência TATOLI/Natalino Belo.

BAUCAU, 13 fevereiru 2024 (TATOLI) – Autoridade lokál suku Caibada, postu administrativu Baucau Vila, husu joven sira-ne’ebe envolve iha grupu organizasaun arte marsiál hamutuk kria paz no estabilidade.

Xefe suku Caibada, Cosme da Costa Lopes, sei kontinua koordena no halo aprosimasaun ho xefe aldeia, Ofisiál Polísia Suku (OPS) inklui veteranu sira nune’e kria kondisaun no tau matan ba situasaun ligadu ho seguransa iha terrenu.

“Baucau oan tenke hamriik hadi’a munisípiu, ita tenke serbisu hamutuk nune’e halo Baucau sai sidade ezemplár ba munisípiu sira seluk,” Xefe suku Caibada informa ba Agência TATOLI iha Vila Antiga, tersa ne’e.

Cosme Lopes, argumenta, suku Caibada iha área luan kompostu Makasa’e no Uaimaa ne’ebé sempre mosu dezentendimentu entre membru arte-marsiál tanba laiha kontrolu maibe atividade organizasaun sei suspende hela nune’e bele fasilita situsaun hakmatek.

Autoridade Caibada konsidera estabilidade no seguransa importante tebes tanba sai baze ba dezenvolvimentu ekonomia iha rai-laran nune’e bainhira ema hotu kontribui kria dame iha kada suku sei atrai investimentu iha Baucau.

“Estabilidade hosi ita aan rasik, ema hotu hakarak dezenvolvimentu maibe seidauk koopera ho governu hodi kria situasaun hakmatek,” Cosme Lopes akresenta.

Suku Caibada hamutuk aldeia hitu kompostu Maulame, Boru-baha, Data-Ua,Caiobilale, Ana-uaru, Uani-uma no Hau-robu ho totál populasaun hamutuk rihun haat-resin hosi uma-kain 981.

Jornalista   : Natalino Belo 

Editór         : Evaristo Soares Martins

iklan
iklan

Leave a Reply

iklan
error: Content is protected !!