iklan

EKONOMIA, HEADLINE

Ministériu Agrikultura apoia produtór budu-tasi ho rihun $250 iha tinan ne’e

Ministériu Agrikultura apoia produtór budu-tasi ho rihun $250 iha tinan ne’e

Maneira kuda budu-tasi. Imajen/Espesiál.

DILI, 13 fevereiru 2024 (TATOLI) – Grupu produtór alga (budu-tasi) hamutuk 429 iha Dili, Ataúro, Liquiçá no Bobonaro, hetan apoiu finanseiru, iha tinan ne’e, hamutuk rihun $250 husi Ministériu  Agrikultura, Pekuária, Peska no Floresta (MAPPF) hodi hasa’e produsaun alga.

Diretór Nasionál Akikultura, Fidelino Sousa Marques, hatete husi totál grupu ne’ebé mak iha rejista ona benefisiáriu sira ne’ebé maka envolve iha atividade haki’ak budu-tasi hamutuk 2.148 no feto iha 45%.

Dirijente ne’e esplika katak ministériu sei rekolla dadus husi grupu sira ne’e no sira-nian kuantidade produsaun kada fulan, nune’e bele reforsa sira-nian atividade ne’e.

“Ita hein hela sira-nian relatóriu. Kuandu tama hotu ona maka sei transfere osan ba sira-nian konta bankária, nune’e bele uza hodi hala’o atividade haki’ak budu tasi”, dehan iha Comoro, ohin.

Objetivu husi apoiu ne’ebe mak atu ajuda benefisiariu sira hetan lukru iha grupu nia laran, tanba nia rezultadu produsaun husi budu tasi ne’e ho kuantidade boot maka bele fa’an iha merkadu,  nomós haruka bá rai-li’ur.

Xefe grupu Bikeli-Ataúro, Moíses da Costa, dehan sira-ninia grupu kompostu husi ema na’in-20 ne’ebé sempre ajuda malu ba haki’ak alga, maibé sira hein mós tulun husi Governu nian, tanba sira aprezenta proposta no bainhira konsidera maka sira sei esforsu hodi organiza malu di’ak liután atu prodús budu-tasi ho kuantidade boot.

“Ami iha esperiénsia haki’ak budu tasi, maibé ami-ninia produsaun sira ne’e fa’an de’it iha mekadu lokál sira iha Ataúro. Dalaruma maluk sira husi Dili mak sosa, tan ne’e ami presiza Governu nia apoiu atu ami hodi hetan fundu uitoan hodi prodús budu-tasi ne’e ho kuantidade barak”, nia espera.

Iha proposta ne’ebé grupu Bikeli hatama ne’e esplikasaun ona kona-ba kuantidade alga ne’ebé prodús no seluk tan, nune’e bele garante sira-nian atividade.

Notísia relevante: Benefisiáriu 300-resin hetan apoiu $49.308 hodi haki’ak ikan

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!