iklan

EKONOMIA, HEADLINE

Empreza Nine Industry ho Kafeti Scrub husu Governu apoia indústria kiik iha Timor-Leste

Empreza Nine Industry ho Kafeti Scrub husu Governu apoia indústria kiik iha Timor-Leste

Ministru Komérsiu no Indústria, Nino Pereira. Imajen Tatoli/Francisco Sony

DILI, 15 fevereiru 2024 (TATOLI) – Na’in ba Empreza Nine Industry, Nilton Gusmão ho Kafeti Scrub, Fatima Perpetua Pereira husu ba Governu atu nafatin apoia indústria kiik sira hodi bele diversifika ekonomia no mós loke kampu servisu barak liután ba timoroan sira.

“Ami husu Governu atu nafatin apoiu atividade indústria kiik sira hodi bele halo saida de’it mak iha, atu diversifika ekonomia no mós loke kampu servisu barak liután ba ita-nia sosiedade sira, entaun hanesan ohin ita haree katak nine industry hanesan empreza foun ida ne’ebé ami estabelese hanesan parte husi kompromisu ha’u-nian hodi investe iha ita-nia rain atu bele  absolve ita-nia mão de obra ne’ebé ita hotu hatene katak sei sai problema ida iha ita-nia rain tanba kampu traballu sei menus”, Nilton Gusmão dehan bainhira hetan vizita husi Ministru Komérsiu no Indústria Filipos Nino Pereira iha nia fatin Farol, ohin.

Imajen Felicidade

Ho vizita MCI nian, atu enkoraja liután indústria sira atu bele rezolve kampu traballu ba ema sira ne’ebé mak la iha servisu.

“Iha ita-nia rain ema barak la’o ba buka servisu iha rai liur, entaun buat sira ne’e hotu mak  motiva ami hodi loke indústria ida-ne’e atu fó servisu ba ita-nia maluk sira ne’ebé mak hakarak servisu”, nia relata.

Empreza Nine Industry agradese ba Governu tanba bele sai parseiru importnate ida hodi apoiu ba dezenvolvimentu ekonomia iha Timor-Leste.

“Ami agradese tebes ba ministru nia vizita tanba ida-ne’e importante hodi hatudu ba Governu ida nia apoiu moral ba ativiade sira ne’ebé mak ami halo, atu nune’e, ami labele sente mesak, se lae ita moris iha nasaun ida, maibé governante sira la hanoin kona setór privadu sira ne’ebé halo atividade, maibé ha’u fiar katak setór privadu hanesan parseiru importante ba Governu”, nia esplika.

Empreza Nine Industry, halo ona Jersey roupa desportu hodi distribui ba klubu iha rai-laran no mós iha planu ba exportasaun.

Iha empreza ne’e timoroan hamutuk 24 inklui trabalhadór estranjeiru ida mak halo jersey ne’e tanba sira iha ona koñesimentu natón hodi hala’o servisu iha empreza ne’e.

Fatin indústria têxtil ne’e iha ekipamentu ne’ebé avansadu ba prosesu jersey tuir dezeñu rasik no operador mesak timoroan. Nune’e Timor-Leste bele ona ba indústria têxtil ho roupa sira bele prodú iha ne’e. Tanba ne’e investimentu ida-ne’e tulun hodi hamenus dezempregu no haburas ekonómia iha Timor-Leste.

Iha fatin ketak, Na’in ba Empreza Kafeti Scrub Fatima Perpetua Pereira, agradese no husu ba parte Governu liuliu Ministériu Komérsiu no Indústria ne’ebé bele vizita fatin Kafeti Scrub atu bele fó dalan oinsá bele halo negósiu ida-ne’e iha rai laran ho di’ak.

“Ha’u agradese ba Ministru Komérsiu no Indústria tanba bele mai vizita ona fatin ida-ne’e, oinsá bele promove ami-nia produtu sira ne’e ho di’ak no oinsá ami bele asesu iha merkadu sira”, nia relata.

Empreza Kafetu Scrub halo prosesa kafe timor sai materia ida hodi kose isin metan no borbullu (Jerawat).

Imajen Felicidade

“Prosesu halo produsaun ne’e mak uza kafe timor ita-nian hamutuk ho derok, kinur no sukaer  hafoin ami hoban ho derok been depois buti sukaer hasai nia musan hafoin kahur ho kafe hodi halo ba Kafeti Scrub, bainhira halo ida-ne’e tenke to’o oras ida ho balun”, nia esplika.

Ministru Komérsiu no Indústria, Filipos Nino Pereira, kompromete nafatin hodi halo kooperasaun ho indústria kiik sira, oinsá iha koordenasaun ho ministériu sira seluk, atu fasilita empreza timoroan sira ne’ebé mak kompromete tebes hodi hatudu ona iha asaun konkreta iha atividade negósiu ho seguru.

“Tanba ne’e mak ha’u hanoin katak ita presiza halo promosaun, enkoraja nafatin ita-nia setór privadu sira hodi haree katak ida-ne’e ita bele halo no Governu sai nafatin parseiru importante  hodi dudu ita-nia setór privadu sira ba oin”, Filipos Nino Pereira afirma.

Ministru enkoraja “Ha’u enkoraja joven sira ne’e tanba  atividade hanesan ne’e inspira joven sira seluk atu hala’o negósiu kiik sira iha ita-nia rain,  tanba  oras ne’e daudaun  ita-nia Governu promove hela  ita-nia produtu rai laran, tanba ita-nia rai ne’e potensiál no iha buat barak ita atu halo hodi prienxe, ita-nia  dezenvolvimentu ekonomia iha ita-nia rain,” informa Filipos Nino Pereira bainhira vizita ba  kafeti scrub iha Bidau Masaur ohin.

Nia dehan, ko’alia kona ba emprendedorismu katak joven ida tenke servisu ba nia aan no fó servisu ba nia maluk sira seluk hodi kontribui ba dezenvolvimentu ekonomia iha Timor-Leste.

“Kona-ba joven emprendendorizmu katak joven ida ne’ebé mak bele servisu ba nia aan no bele servisu ba ema ida ka na’in rua, ida-ne’e impotante atu hatudu realidade ida katak ita boot sira bele kontribui buat ne’ebé mak fasil no buat ne’ebé mak halo ba ita-nia rain”, nia esplika.

Nia relata, ho insiativa joven sira nian oinsá loke negósiu kiik sira presiza aprende iha media sosiál tanba iha buat pozitivu balun iha ne’eba atu ajuda.

“Ita boot nia produtu tama ona iha munisípiu sira ha’u hanoin merkadu sira iha ona no oinsá hadia nia kualidade, hadia ninia legalidade nune’e ba futuru diak liután iha ita-nia rian”, nia afirma.

Tanba ne’e, MCI nafatin promove joven sira hodi hatudu kreatividade ho inisiativa ba produtu sira-ne’e, bainhira tama ona merkadu mak mantein nafatin hodi hasoru dezafiu saida de’it.

“Ho nune’e ami sei apoiu maibé la’os osan de’it maibé fasilita ita boot iha oportunidade hodi partisipa iha feira ka ba tuir formasaun iha rai liur no mós oinsá bele asesu produtu ida-ne’e ho emprezáriu sira seluk hodi hakbiit emprezáriu timor an hotu iha ita-nia rain, entaun ha’u hanoin katak ita enkoraja malu hodi dudu ita boot ninia atividdae ekonomika ne’e ba oin”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!