Autoridade Baucau sei kria kondisaun antes muda negosiante ba merkadu Tuanau
BAUCAU, 16 fevereiru 2024 (TATOLI) – Autoridade Administrasaun Munisipál Baucau sei kria uluk kondisaun hanesan fasilidade antes muda negosiante hosi merkadu Vila Nova no Antiga ba merkadu foun Tuanau.
Prezidente Autoridade Munisipál (PAM) Baucau, Veneranda Eurico Marques Lemos Martins, esplika, liuhosi vizita direita ba terrenu observa no nota katak merkadu Tuanau iha ona kondisaun hanesan moru, uma ba vendedór, eletrisidade, bee-moos inklui saneamentu maibe presiza aumenta tan kioske no fahe fatin tipu negosiu nune’e bele fasilita vendedór no kompradores sira.
“Pelumenus ita organiza no kompleta fasilidade nune’e ita-nia vendedór sira sente dignu antes halo atividade negosiu iha merkadu Tuanau,” Prezidente Autoridade Munisipál Baucau hateten iha Vila Nova, sesta ne’e.
Autoridade Baucau mos planeia ho Governu Sentrál liuhosi Ministériu Komérsiu, Indústria (MKI) ligadu ho dezeñu konstrusaun merkadu nune’e bele ajusta tuir atividade negosiu.
Veneranda Lemos, argumenta, alende kria kondisaun ba vendedór permanente presiza fo espasu mos ba vendedór ambulante sira hosi postu administrativu no suku seluk ne’ebé halo atividade negosiu iha loron bazar.
“Ami presiza halo tan de’it divizaun ba parte balun hanesan fa’an na’an no ikan nian nune’e komprador bele hatene,” Veneranda Lemos akresenta.
Autoridade Baucau konsidera sidade presiza organiza nune’e kria kondisaun dignu ba negosiante no preparadu ba poder lokál no desentralizasaun administrativa iha futuru liuliu ba jerasaun foun sira.
Merkadu Tuanau rasik purvolta ektare ualu hahu konstrui fazeadamente hosi tinan-2018 liuhosi orsamentu Planu Dezenvolvimentu Integradu Munisipál (PDIM) hanesan konstrui uma inklui moru protesaun
Total vendedór ne’ebé sei hala’o atividade negosiu iha merkadu Tuanau Baucau hamutuk na’in-898 no harii ona Asosiasaun Vendedór Merkadu Baucau ho tipu negosiu hamutuk 12.
Jornalista : Natalino Belo
Editór : Evaristo Soares Martins
