iklan

EKONOMIA, BAUCAU, HEADLINE, MUNISÍPIU

Autoridade deside muda loron bazar iha merkadu Baucau

Autoridade deside muda loron bazar iha merkadu Baucau

Prezidente Autoridade Munisipál Baucau, Veneranda Eurico Marques Lemos Martins. Imajen Agência TATOLI/Natalino Belo.

BAUCAU, 16 fevereiru 2024 (TATOLI) – Autoridade Administrasaun Munisipál Baucau deside muda loron bazar iha merkadu Vila Nova hosi kinta ho domingu ba tersa no sesta.

Prezidente Autoridade Munisipál (PAM) Baucau, Veneranda Eurico Marques Lemos Martins, esplika, desizaun refere foti hafoin konsulta ho entidade hotu-hotu tanba konsidera loron domingu santu presiza deskansa no fokus ba misa.

“Hanesan ema sarani preokupa tanba ita ses ona oituan hosi loron ne’ebé Maromak fo ba ita atu deskansa,” Prezidente Autoridade Munisipál Baucau hateten iha Vila Nova, sesta ne’e.

Autoridade Baucau hala’o sorumutu ho Igreja, konsellu veteranu, komandu Polísia Nasionál Timor-Leste Baucau, komponente terrestre Falintil-FDTL, Asosiasaun Vendedór Merkadu konsege hamosu konkordasaun hodi muda atividade bazar hosi loron kinta ba tersa inklui dumingu muda ba sesta.

Desizaun refere sei reforsa ho rezolusaun ne’ebé sei fo sai hosi Autoridade Baucau no tuir planu sei kontinua halo sosializasaun liuhosi Autoridade postu, suku no igreja inklui eskola sira nune’e komunidade informadu antes implementa mudansa loron bazar.

“Se sosialiazasaun mak perkore ona hotu iha munisípiu Baucau laran, ita bele hahú iha fulan-abríl,” Veneranda Lemos akresenta.

Mesmu loron mak muda maibe atividade negosiu iha merkadu Vila Nova kontinua la’o maibe iha loron-dumingu mak presiza fo propiedade ba ispiritual nu’udar ema sarani katolika.

Prezidente Asosiasaun Vendedór Merkadu Baucau, Daniel Soares dos Santos, apoia ho desizaun autoridade munisipál Baucau kona-ba muda loron bazar nune’e atividade ekonomia labele tenta loron-domingu ne’ebé konsideradu nu’udar loron santu.

“Ami hotu-hotu aseita no prontu atu ajuda sosializasaun antes mudansa loron bazar,” Daniel dos Santos hateten.

Total vendedór ne’ebé sei hala’o atividade negosiu iha merkadu Baucau hamutuk na’in-898 no harii ona Asosiasaun Vendedór Merkadu Baucau ho tipu negosiu hamutuk 12.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!