INSPTL disemina matadalan prevensaun Rabies bá Saúde Bobonaro
BOBONARO, 16 fevereiru 2024 (TATOLI)-Ministériu Saúde liuhosi Institutu Nasionál Saúde Públika Timor-Leste (INSPTL), sesta ne’e halo diseminasaun matadalan no jestaun prevensaun moras Rabies ba profisionál saúde sira iha munisípiu Bobonaro.
Formadór INSPTL, José de Deus Alvez, hateten munisípiu Bobonaro no munisípiu tolu seluk hanesan Dili, Covalima no Rejiaun Administrativa Epesiál Oe-Cuse Ambeno (RAEOA) hanesan munisípiu fronteira ne’ebé risku no fasil tebes moras Rabies atu halo transmisaun.
Tanba daudaun ne’e moras Rabies endemik ona iha Soe, Nusa Tenggara Timur (NTT), Repúblika Indonézia no konsege hamate ona ema barak.
Notísia relevante: Autoridade Bobonaro husu abitante sira labele sosa asu ilegál hosi Atambua
“Ita-nia munisípiu haat ne’e tinan kotuk, hetan tiha treinamentu kona-bá programa ne’e, ida-ne’e ita mai fali halo sosializasaun atu nune’e bele implementa iha aban-bainrua,” nia informa jornalista sira iha edifísiu Cruz Vermelha Timor-Leste, Filál Maliana.
Tuir nia, daudaun ne’e Timor-Leste sei livre hela hosi moras Rabies, maibé nafatin apela ba komunidade sira liu-liu sira-ne’ebé hela iha liña fronteira atu evita sosa ka hatama asu ilegál hosi Atambua.
“Ita haree karik animal ruma mak lori mai hosi mota-sorin, favór liuhosi dalan boot atu nune’e halo kuarentina, depois ita-nia veterináriu sira bele halo kontrolu no vasina animal sira-ne’ebé ita atu lori tama mai ita-nia nasaun, no hetan animal sira agresivu, hatenu beibeik, kaben mutin sai fó hatene kedas ba veterináriu sira atubele vasina tiha asu ne’e, depois hado’ok-aan hosi asu ne’e labele taka fali ita,” nia katak.
Diretór Servisu Saúde Munisípiu Bobonaro, Gíl Bernardo Vicente, agardese no konsidera atividade ne’e bele eleva profisionál saúde sira-nia koñesimentu hodi nune’e bele halo jestaun no intervensaun ba moras refere.
Enkuantu daudaun ne’e ekipa Vasinadór hosi Ministériu Agrikultura, Pekuária, Peska no Floresta na’in-20 mak halo hela vasinasaun ba animál asu, busa no lekirauk iha munisípiu Bobonaro hodi prevene transmisaun moras Rabies.
Notísia relevante: Governu lansa vasinasaun animal prevene Raiva iha Bobonaro
Jornalista: Sérgio da Cruz
Editór: Evaristo Soares Martins
