Saúde Bobonaro rejista kazu Chikungunya lima
BOBONARO, 16 fevereiru 2024 (TATOLI) – Diresaun Servisu Munisipál Saúde Bobonaro, hahú fulan-janeiru to’o ágora deteta kazu moras Chikungunya hamutuk lima.
Pontu Fokál Vijilánsia Servisu Saúde Munisípiu Bobonaro, Doutór Jerónimo de Sousa, esplika kazu hirak-ne’e maioria iha kapitál Maliana hosi suku Raifun ida, Lahomea ida, Odomau ida no Holsa maka na’in-rua.
“Ita rejista kazu lima, iha feto ida no mane haat, agora ita foti ona sampel haruka ona ba laboratóriu nasionál, maibé to’o agora rona informasaun katak reajente atu halo prosesu ba Chikungunya ne’e seidauk to’o mai, maibé ita-nia servisu vijilánsia kazu sira-ne’ebé mak ho síntoma hatudu ba iha-ne’ebá ita nafatin foti sampel, no transporta ba laboratóriu nasionál, bainhira reajente ne’e to’o mai, ita simu nia rezultadu,” nia informa ba jornalista sira iha Maliana, kinta ne’e.
Jerónimo subliña, tuir loloos moras ne’e eziste kleur tiha ona no ninia kauza ka transmisaun liuhosi susuk Aedes Aegipty no Aedes Albopitus, tanba moras ne’e síntoma kuaze atu hanesan ho moras dengue.
“Diferente mak Chikungunya ne’e nia to’o iha faze ida shoock ne’e, tanba laiha himoragia, nia halo de’it isin-mana,s bee-doko, ruin kolen hotu, maibé atu to’o iha pendarahan hanesan dengue nia ne’e laiha ida, ninia ai-moruk mos kuaze hanesan, ita hemu paracetamol, konsumu liquido ne’ebé barak, deskansa barak ita bele di’ak fali,” nia katak.
Diretór Servisu Munisipál Saúde, Bobonaro, Gil Bernardo Vicente, halo ona intervensaun liuliu fahe informasaun iha kanál Rádiu Komunidade Maliana, Igreja no autoridade lokál sira.
“Ita fó hatene, karik hetan moras Chikungunya no Dengue atu bele ba lalais fasilidade saúde hodi hetan intervensaun,” nia fó hanoin.
Nia mós konsiensializa komunidade hotu atu halo limpieza jerál kada sesta hodi prevene susuk Aedes Aegipty husik nia tolun iha arreadór uma nian no fatin seluk tán.
Notísia relevante: MS rejista kazu dengue 147 no Chikungunya 195
Jornalista: Sérgio da Cruz
Editór: Evaristo Soares Martins
