ISC Polo Baucau muda maneira orientasaun akadémika ba estudante foun
BAUCAU, 21 fevereiru 2024 (TATOLI) – Institutu Superiór Cristal (ISC) Polo Baucau, muda maneira orientasaun akadémika ba estudante foun sira tanba hakarak estudante sira foka ba matéria liuhosi aprezentasaun power point.
Magnífiku Reitór ISC Polo Baucau, Sebastião Pereira, esplika, atividade refere realiza ho objetivu atu fó koñesimentu ambiente eskola nian ba estudante foun sira nune’e bele hatene arreadores no ambiente no durante orientasaun husu dosente sira labele fó presaun ba estudante foun sira.
Estudante foun ne’ebé tuir orientasaun akadémika iha ISC Polo Baucau hamutuk na’in-174.
“Ha’u hakarak haree lalika lori tan buat sasán sira hanesan ai-sar, balde, lori mak regulamentu akadémiku nian, lori mak kadernu ho lapizeira nune’e dosente sira esplika ho power point. Karik imi bele hakerek no rona tau iha ulun,” Magnífiku Reitór ISC hateten iha Vila Nova, kuarta ne’e.
ISC la autoriza estudante foun sira atu lori materiál hanesan balde, ai-sar inklui sasán seluk maibé presiza estudante sira lori mak kadernu no lapizeira inklui tenke kumpri regra akadémiku nune’e aprende matéria foun ruma hosi dosente.
SebastiãoPereira, husu dosente hotu atu ativu hanorin estudante sira no husu estudante sira atu ativu estuda ho koopera nune’e bele hetan siénsia foun husi dosente.
Estudante foun fakuldade edukasaun, Madre Escolastica Pereira, sente kontente tuir aula iha ISC Polo baucau tanba atu kompleta diploma nune’e kontinua hanorin estudante sira iha nível baze tanba tuir kritéria hosi Ministériu Edukasaun manorin ne’ebé diploma ensiñu sekundáriu labele hanorin estudante.
“Ha’u diploma sekundária agora atu hetan tán diploma Universidade, ha’u tenke kontinua iha universidade,” nia katak.
Hosi totál estudante foun tinan akadémiku tinan 2024 Institute Superiór Cristal Polo Baucau nain-174 kompostu husi fakuldade saúde no edukasaun, departamentu ekonomia na’in-29, língua ingles 14, portugues 48, parteira 27 no departamentu emfermajen hamutuk na’in-56.
Jornalista : Natalino Belo
Editór : Evaristo Soares Martins
