iklan

BAUCAU, HEADLINE, MUNISÍPIU, SEGURANSA

PNTL Baucau sei halo operasaun iha tempu kalan

PNTL Baucau sei halo operasaun iha tempu kalan

Komandante PNTL Baucau, Superintendente Xefe Antóninho Mauluta. Imajen Tatoli/Natalino Belo.

BAUCAU, 21 fevereiru 2024 (TATOLI) – Komandu Polísia Nasionál Timor Leste (PNTL) Munisípiu Baucau, lideradu Superintendente Xefe Antoninho Mauluta, sei halo operasaun iha tempu kalan, relasiona ho konfrontu entre joven iha suku Uailili, postu administrativu Baucau Vila.

“Ita sei hatún orden atu haree no orienta ona komandante operasaun atu prepara planu seguransa iha tempu kalan ba fatin ne’ebé sempre mosu problema,” Komandante PNTL Baucau hateten iha Vila Nova, kuarta ne’e.

Nia dehan, planu operasaun refere sei foka ba fatin konsentrasaun joven nian maibé sei movel tanba problema hanesan sei kontinua akontese iha tersa, 20 fevereiru maibé parte seguransa asegura ona no koordena ho parte autoridade suku inklui komunidade hodi buka solusaun.

Komandante PNTL Baucau ko’alia kestaun ne’e relasiona ho konfruntu entre joven ne’ebé akontese iha loron-segunda, 19 fevereiru ne’e. Kazu ne’e rezulta uma rua hetan estragus.

Komandante Antoninho Mauluta, deskonfia kazu ne’e envolve hosi membru organizasaun arte-marsiál balun.

Nia dehan, kazu ne’ebé akontese iha loron-segunda, 19 fevereiru oras ne’e parte autoridade seguransa halo hela investigasaun.

“Ita orienta ona investigasaun ba terrenu atu halo identifikasaun ba sasán estragus inklui vítima sira nune’e kontinua halo prosesu,” nia hateten.

Nia fó-sai katak, parte investigasaun indentifika ona suspeitu na’in-ida ne’ebé sai autór ba kazu refere nune’e PNTL Baucau sei bolu líder organizasaun arte-marsiál balun hodi husu justifijkasaun.

Komandu PNTL Baucau husu komunidade sira atu pasa informsaun ba parte seguransa bainhira mosu konflitu ruma iha baze nu’udar parte hosi prevensaun konflitu.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!