DILI, 22 fevereiru 2024 (TATOLI) – Reitór Institute of Bussiness (IOB) enkoraja emprezáriu foinsa’e sira atu hahú investe iha setór turizmu tasi nian iha Timor-Leste (TL).
“Ita iha tasi-ibun ne’ebé furak, hodi bele konsege dada turista internasionál no turista lokál sira atu diversifika ekonomia Timor-Leste nian iha futuru tanba ne’e mak presiza dezenvolve turizmu tasi ho di’ak liután,” Reitór IOB, Pedro Ximenes, hateten, iha ámbitu sesaun formasaun emprezariál ba emprezáriu foin-sa’e sira iha Hotel Novu Turizmu, ohin.
Akadémiku ne’e esplika, iha oportunidade negósiu barak mak bele dezenvolve hodi halo osan, mak uza turizmu tasi nian.
“Ita iha bee-tasi nian ne’ebé klaru no mós iha vizaun tasi nian ne’ebé furak tebes. Tanba ne’e, ami enkoraja emprezáriu sira atu investe iha setór turizmu tasi nian tanba oportunidade ida-ne’e estratéjiku tebes atu halo osan hodi diversifika ekonomia Timor-Leste nian iha futuru,” nia dehan.
Líder másimu husi ensinu superiór ho lema ‘Eselénsia no preferénsia” ne’e afirma, emprezáriu foinsa’e sira tenke iha hanoin ekonómiku, inovativu no kriativu hodi buka oportunidade estratéjiku ba empreza sira atu halo osan hodi diversifika ekonomia reziliente ida, ne’ebé mak jere turizmu tasi nian hanesan alternativa ida ba dezenvolvimentu setór turizmu iha Timor-Leste.
Iha fatin hanesan, Treinadór emprezariál, Tiago Jen, hateten, emprezáriu foinsa’e sira atu hahú dezenvolve turizmu tasi nian hodi atrai turista internasionál sira no turista lokál sira atu vizita Timor-Leste.
“Turizmu tasi-ibun iha Timor-Leste sei domina nafatin husi diversidade internasionál sira, tanba ne’e ami enkoraja emprezáriu sira atu hahú investe iha setór turizmu tasi nian, mak liuhusi treinamentu ba turista internasionál sira no turista lokál sira hodi diversifika ekonomia Timor-Leste nian iha futuru,” Tiago Jen esplika.
Nia haktuir, iha emprezariu balun ne’ebé investe ona iha setór turizmu tasi nian hanesan illa Ataúro, Com, illa Tasi-tetuk Baucau no tasi-ibun sira seluk iha Timor-Leste maibé seidauk konsege mai husu ba emprezáriu foin-sa’e sira atu hahú investe iha setór turizmu tasi nian liuhusi fornese ekipamentu fatin ne’ebé adekuadu.
“Iha emprezáriu balun ne’ebé investe ona iha setór turizmu tasi nian hanesan illa Ataúro, Com, illa Tasi-tetuk Baucau no tasi-ibun sira seluk iha Timor-Leste maibé seidauk konsege mai husu ba emprezáriu foinsa’e sira atu hahú investe iha setór turizmu tasi nian liuhusi fornese ekipamentu no hela-fatin ne’ebé adekuadu, atu nune’e dada turista sira atu vizita hodi diversifika ekonomia iha Timor-Leste iha futuru,” nia dehan.
Antes ne’e, Governu Timor – Leste liu husi Ministériu Turizmu no Komérsiu anunsia katak bainhira Timor – Leste fornese infraestrutura turizmu ne’ebé sufisiente, tuir estimativa katak turista internasionál sira sei vizita Timor – Leste maizumenus 200,000 iha tinan ida-ida.
Iha Programa Governu Konstitusionál da-sia, fó mós prioridade ba promosaun ba dezenvolvimentu ekonómiku no sosiál país nian. Iha programa ne’e hateten, turizmu hanesan motór importante ba dezenvolvimentu atividade ekonómika, hodi kontribui mós ba salvaguarda ka defeza patrimóniu naturál no kulturál Timor-Leste nian.
Jornalista : Felicidade Ximenes
Editór: Rafael Ximenes de A. Belo
