Governu husu atleta timoroan aproveita DIM 2026 hodi dezenvolve kapasidade
DILI, 08 Agostu 2026 (TATOLI)—Governu Timor-Leste liuhosi Ministru Juventude, Desportu, Arte no Kultura (MJDAC), Nelyo Isaac Sarmento, husu atleta timoroan sira atu aproveita oportunidade iha Dili International Maratona (DIM) 2026 hodi hasa’e esperiénsia, dezenvolve kapasidade no prepara-an atu sai atleta nasionál ne’ebé kompetitivu iha futuru.
Nia konsidera Dili International Maratona hanesan plataforma importante ida ba atleta timoroan sira atu prova sira-nia kapasidade iha kompetisaun ho atleta internasionál sira inklui partisipante husi nasaun oioin.
Liuhusi partisipasaun iha DIM 2026, atleta lokál sira bele aprende husi esperiénsia atleta internasionál, hasa’e dixiplina, rezisténsia no téknika korrida, no identifika aspetu sira-ne’ebé presiza hadi’a atu bele prepara-an ba kompetisaun iha nivel nasional no internasionál.
”Dili International Marathon ne’e hanesan atividade ida atu promove Timor-Leste liuhusi atleta sira ba mundu internasionál. Aleinde ne’e, atividade ne’e mos atu hasa’e konsiénsia komunidade nian kona-ba importánsia prátika ezersísiu iha moris loro-loron,” Nelyo Isaac informa.
Nia hateten, DIM 2026 bele konsidera hanesan atividade desportiva ne’ebé ajuda komunidade atu mantein saúde no prevene moras oioin.
Tuir ministru, DIM mós fó oportunidade ba atleta lokál no internasionál atu fahe esperiénsia no aprende ba malu. Enkuantu, enkontru entre atleta no parte sira-ne’ebé envolve iha desportu bele loke espasu ba diskusaun no kooperasaun inklui iha nivel ASEAN.
Governu mós enkoraja joven timoroan sira atu haree desportu, liuliu atletizmu hanesan área ida-ne’ebé bele dezenvolve talentu no fó oportunidade ba futuru.
Preparasaun kontínua, treinamentu rigorozu no partisipasaun iha kompetisaun internasionál konsidera importante atu kria atleta nasional ne’ebé iha kapasidade atu kompete ho di’ak.
Dili International Maratona 2026 hala’o iha Díli, ho kategoria sira inklui Full Maratona 42.195Km, Half Maratona 21.1Km, 10Km Para-Athletes no lima (5) 5Km Fun Run.
Eventu ne’e mós atrai partisipante internasionál husi nasaun oioin no sai oportunidade importante ba atleta timoroan atu hasoru esperiénsia desportiva iha nivel internasionál.
MJDAK espera katak partisipasaun iha DIM 2026 la’ós de’it atu buka rezultadu iha korrida, maibé mós sai prosesu ida atu forma, dezenvolve no prepara jerasaun atleta nasionál foun ne’ebé bele lori naran Timor-Leste ba kompetisaun internasionál iha futuru.
Ho apoiu husi Governu, federasaun desportiva, treinadór, atleta no komunidade, Dili International Maratona bele kontinua sai plataforma importante ida ba dezenvolvimentu atletizmu no desportu iha Timor-Leste.
Jornalista : Felicidade Ximenes
Editór : Cancio Ximenes
