Teófilo Freitas mantein primeiru lugar iha kategoria para atletizmu 10Km iha DIM
DILI, 08 Agostu 2026 (TATOLI) – Atleta Teófilo Freitas marka primeiru lugar iha eventu Maratona Internasionál Dili, iha kategória para atletizmu ba korrida kilómetru 10 (10Km). Atleta timoroan ne’e hatudu konsisténsia no forsa boot durante korrida tomak, hodi mantein nia pozisaun iha frente dezde inísiu to’o remata.
Iha kompetisaun ne’e, Teófilo Freitas sai hanesan atleta dominante iha nia kategoria, hodi hakat dezafiu sira husi perkursu no kondisaun durante korrida. Nia rezultadu ne’e reforsa tan nia prestasaun di’ak iha eventu internasionál sira iha Timor-Leste.
Organizasaun eventu ne’e la’o ho di’ak no fó oportunidade ba atleta para atletizmu sira atu partisipa iha nivel internasionál, hodi promove inkluzaun iha desportu.
Teófilo Freitas nia vitória ne’e mós sai inspirasaun ba atleta sira seluk, liuliu iha área para atletizmu, atu kontinua treina no partisipa iha kompetisaun sira iha futuru.
Atleta Teófilo fó apresiasaun ba Prezidénsia Repúblika, Governu no Komisaun Organizadora ba eventu Maratona Internasionál Dili, tanba fó oportunidade ne’ebé inklui ema ho defisiénsia sira iha eventu internasionál, iha tinan ida-ne’e.
“Agradese ba Santísima Trindade ba grasa no kbiit tomak mai ha’u. Ha’u bele atinje eventu ida-ne’e ho kondisaun ne’ebe di’ak no susesu. Agradese mós ba parte Palásiu Prezidensiál ne’ebé inklui ona ema ho difisiénsia iha Dili Internationl Marathon ida-ne’e. Agradese mós ba ami-nia treinadór ne’ebe la baruk dedika ona ami,” Teófilo Freitas dehan ba jornalista sira, iha Palásiu Presidensiál, ohin.
Nia hatete maski idade avansada, maibé seidauk iha atleta potensiál ne’ebe atu hadau pozisaun primeiru lugar iha korrida ho kategória 10km.
“Ha’u kontente tebes, tanba to’o agora seidauk iha ema ruma mak hadau ha’u-nia record primeiru lugar, durante eventu Dili International Marathon”, nia konklui.
Notísia relevante: Atleta Teófilo sai vensedór iha kompetisaun Dili Maratona kilómetru 10
Jornalista: Felicidade Ximenes
Editór: Cancio Ximenes
