Atleta Teófilo sai vensedór iha kompetisaun Dili Maratona kilómetru 10
DILI, 02 setembru 2023 (TATOLI)—Alteta ema ho defisiénsia, Teófilo Freitas, sai vensedór primeiru lugár iha eventu Dili Internasionál Maratona 2023 ho distánsia kilómetru 10.
Eventu ne’e ho tema ‘halai ba dame, halai ba saudável’, ne’ebé organiza hosi Prezidénsia Repúblika hamutuk ho entidade relevante sira.
“Ha’u sente kontente tamba iha espasu ba ami ho defisiénsia hodi bele partisipa direita iha eventu maratona ida-ne’e, ne’ebé motiva tebes ba ami atleta ema ho defisiénsia hodi hala’o ezersísiu,” Atleta hateten hafoin ramata eventu iha Palásiu Prezidensiál, Bairru Pité, sábadu ne’e.
Notísia relevante : Atleta Teófilo agradese PR Horta ne’ebé realiza eventu Dili Internasionál Maratona
Maratona ho distánsia kilómetru 10 ba kategoria rua, kompostu hosi jerál no paralímpiku ema ho defisiénsia. Kategoria paralímpiku atleta feto ne’ebé okupa primeiru lugár maka Levanita da Costa, enkuantu kategoria jerál atleta feto ne’ebé okupa primeiru lugár maka Lizia F. no mane Rogeiro Maubiti.
Ekipa responsável oferese prémiu osan ba kategoria tolu ho montante $600 to’o $1.000. Rute ne’ebé atleta sira ultrapasa ho distánsia 10, hahú hosi Palásiu Prezidensiál nia oin to’o rotunda Prezidente Nicolau Lobato, liuhosi tasi-ibun Praia dos Coqueiros to’o filafali bá Palásiu Prezidensiál.
Enkuantu maratona ho distánsia kilómetru 21, atleta feto ne’ebé okupa primeiru lugár maka Ângela Freitas no mane Felisberto de Deus ho prémiu $1500 to’o $2500. Rute ne’ebé atleta sira ultrapasa, hosi Palásiu Prezidensiál bá rotunda Prezidente Nicolau Lobato, liuhosi tasi-ibun Praia dos Coqueiros, Palásiu Governu, ótel California Metiaut no filafali bá Palásiu Prezidensiál.
Ba distánsia kilómetru tolu ho rute hosi Palásiu Prezidensiál bá Miramar fuel no filafali bá Palásiu Prezidensiál.
Kompetisaun ne’e ne’e loke hosi Prezidente Repúblika, José Ramos Horta, akompaña ho membru Governu balun, hahú hosi tuku 06:00 dadeer no termina iha tuku 10:00.
Dili Internasionál Maratona tinan ne’e hetan partisipasaun hosi atleta nasaun viziñu Nusa Tenggara Timur (NTT), Indonézia.
Eventu ne’e sei realiza kada tinan hodi promove talentu joven iha mundu desportu ho tipu oin-oin.
Jornalista : Nelson de Sousa
Editora : Julia Chatarina
