Autoridade Suku planeia konstrui pre-eskolár iha Defauasi
BAUCAU, 23 fevereiru 2024 (TATOLI) – Autoridade suku liuhosi orsamentu Programa Nasionál Dezenvolvimentu Suku (PNDS) planeia konstrui pre-eskolár ida iha suku Defauasi, postu admistrativu Baguia iha tinan-ne’e.
Xefi suku Defauasi, Salustiano Ximenes Guterres, esplika, liuhosi reuniaun konsellu suku deside planu aktividade iha programa regulár PNDS deside ona konstrusaun pre-eskolár tanba iha suku refere seidauk iha eskola pre-eskolár.
“Ami-nia planu preparadu ona no sei haforsa tán de’it debate iha nivel postu nian,” Xefie suku Defauasi hateten iha Vila Antiga, sesta ne’e.
Prosesu konstrusaun eskola refere tuir loloos realiza iha tinan-2023 maibé labele realiza nune’e bainhira implementa sei konstrui sala aula ba estudante inklui edifiísu ba profesór sira no sintina ida.
“Atividade eskola la’o ona maibé sei utiliza postu sanitáriu entaun ida-ne’e prioridade,” Salustiano Guterres akresenta.
Alende ne’e, konsellu suku mós deside liuhosi orsamentu PNDS sei aloka orsamentu pursentu 15 ba atividade manutensaun hanesan hadi’a kanu no manutensaun estrada.
Tuir planu atividade regular PNDS tinan-ne’e iha suku Defauasi ho totál orsamentu hamutuk rihun $48.500 ne’ebé alende konstrusaun pre-eskolár sei utiliza mós ba reabilitasaun irrigasaun eskla kiik no reparasaun estrada iha suku laran inklui manutensaun bee-moos.
Suku Defauasi hamutuk aldeia haat kompostu aldeia Saemeta, Laribere, Defauasi no Uarou ho totál populasaun hamutuk 1.225 hosi uma-kain 225.
Jornalista : Natalino Belo
Editór : Evaristo Soares Martins
