Autoridade Baucau rejeita fó projetu direta bá kompañia hamoos lixu

BAUCAU, 26 fevereiru 2024 (TATOLI) – Autoridade Administrasaun Munisipál Baucau rejeita fó projetu direta bá kompañia hamoos lixu no konsidera hoax ligadu ho informasaun ne’ebé espalla iha rede sosiál.

Prezidente Autoridade Munisipál (PAM) Baucau, Veneranda Eurico Marques Lemos Martins, komenta, pesoál ne’ebé lansa informasaun refere laiha responsabilidade tanba akuza fó direita projeitu ba kompañia Cuba Unipesoal.lda ne’ebé la apár ho mandatu PAM tanba seidauk fulan-ida sura hosi loron toma pose.

“Ema ida halo issue dehan halo alegasaun ba ha’u-nia partisipasaun ekonómika ne’e ema ho moras mentál, ha’u bele dehan nia lanu,” PAM Baucau hateten iha Vila Nova, segunda ne’e.

Eis deputada ne’e, argumenta, kona-bá konkursu públiku tenke iha prosesu naruk tanba presiza halo identifikasaun hanesan avizu, selesaun dokumentu to’o halo kalendáriu ba prosesu aprozionamentu mak foin loke ba públiku.

Nia hateten, simu knaar nu’udar PAM Baucau tanba hakarak atu serbí iha rai-rasik liuliu kontribui ba prosesu dezenvolvimentu no prepara munisípiu Baucau sai podér lokál no desentralizasaun administrativa iha futuru.

“Ha’u simu nomeasaun ida-nee hakarak mai servisu hadi’a ha’u-nia rai se mau mai atu halo korupaun entaun hau lalika mai ida,” Veneranda Lemos akresenta.

Autoridade Baucau konsidera hamoos lixu importante tanba sei halo sidade moos no hadook komunidade hosi moras nune’e problema lixu sa prioridade iha mandatu PAM Veneranda Lemos nian.

Administrasaun Munisipál Baucau seidauk loke konkursu públiku ba kompañia ruma hodi hamoos lixu iha sidade maibé deside kontrata pesoál hamoos lixu hamutuk na’in-19 ne’ebé kada loron halo knaar rekolla lixu iha Baucau Vila.

Antes ne’e, informasaun lansa iha rede sosiál fó-sai Autoridade Munísipiu Baucau fó projetu direita ba kompañia Cuba Unipesoal.lda no akuza PAM Baucau halo krime partisipasaun ekonomia.

Prezidente Autoridade Baucau ne’e konsidera informasaun hirak-ne’e laloos.

Jornalista   : Natalino Belo 

Editór         : Evaristo Soares Martins