iklan

JUSTISA, HEADLINE

CAC la hetan delegasaun kompeténsia husi MP maibé atende nafatin denúnsia

CAC la hetan delegasaun kompeténsia husi MP maibé atende nafatin denúnsia

Logotipu CAC. Imajen/Espesiál

DILI, 27 fevereiru 2024 (TATOLI)-Diretór Investigasaun Komisaun Anti Korrupasaun (CAC, sigla portugés), José Verdial, hateten, durante fulan rua ona, hahú hosi janeiru no fevereiru tinan ne’e, Ministériu Públiku (MP) la delega ona kompeténsia ba iha CAC atu kontinua halo investigasaun ba krimi korrupsaun sira, tanba ho razaun Komisáriu CAC to’o agora seidauk iha.

“Durante janeiru no to’o mai iha fim fevereiru ne’e laiha tan delegasaun ruma hosi Ministériu Públiku mai iha CAC, ida ne’e por kazu tanba ita laiha Komisáriu,” José Verdiál hateten ba jornalista sira iha nia kna’ar fatin CAC, Farol, Dili, tersa ne’e.

Diretór investigasaun CAC ne’e esplika, tuir lei númeru 8/2009, klaru katak Komisáriu mak iha kna’ar atu diriji komisaun no Komisáriu mak iha kna’ar para depois bele kontrola legalidade ba iha asaun prevensaun ba iha investigasaun iha CAC.

Tanba ne’e, hafoin Parlamentu Nasionál manda karta Komisaun Anti Korrupsaun iha 5 abríl 2023 hodi hakotu mandatu Komisáriu CAC nian ho nune’e kuaze prosesu hotu iha CAC la’o ladún efetivu.

Maibé iha servisu seluk ne’ebé CAC halao nafatin mak kontinua atende nafatin denúnsia sira hosi públiku liga ho indisiu deskonfia ba krimi korrupsaun ninian.

“Los duni katak atu besik tinan ida ona CAC halo nian servisu ladún efetivu, tanba laiha Komisáriu, tanba lei kriasaun CAC klaru só Komisáriu mak iha kna’ar para lidera Komisaun ne’e,” nia adianta.

Nia dehan, CAC ne’e iha orsamentu, maibé kuandu laiha Komisáriu orsamentu labele ezekuta, entaun durante ne’e ida ne’e sai hanesan obstákulu ida ba CAC.

“Ita-bo’ot sira (Jornalista) hatene obstákulu seluk ne’ebé CAC agora daudaun hasoru mak kuandu laiha Komisáriu entaun asaun polísiál ne’ebé normálmente pretense ba CAC nia kompeténsia para atu halo, CAC labele halo ezemplu hanesan hanesan halo operasaun ba kontrolu karreta Estadu nian, CAC labele halo kontrolu ho másimu tanba Komisáriu laiha,” nia informa.

Verdial hateten, asaun polísiál ne’ebé lei fó dalan ba CAC atu halo mak ba kazu sira seluk ne’ebé ezize CAC atu halo liliu halo intervensaun ba krimi korrupsaun atu ne’ebé ejize CAC halo apreensaun no buska ho fragrante delitu CAC labele halo tanba laiha Komisáriu.

“Komisáriu mak iha knaar bele kontrola legalidade asaun prevensaun no asaun investigasaun. Entaun ida ne’e prejudika tebes servisu CAC nian,” nia hateten.

Nia dehan, CAC só halo averiguasaun depois ita halo tiha auto partisipasaun hodi haruka kedan ba Minsteriu Públiku, tanba atu garante legalidade ne’e tuir lei

“Iha buat balun ne’ebé ita presiza atu halo ne’ebé defini ona iha planu asaun anuál CAC agora ita labele halo no atu ezekuta osan ita labele tanba hanesan ha’u dehan Komisáriu laiha,” nia akresenta.

Remete ona kazu akizisaun ai-moruk ba MP

Iha parte seluk, Diretór Investigasaun, José Verdiál informa katak CAC konklui ona investigasaun ba kazu akizasaun ai-moruk ne’ebé halo hosi empreza Salimago hodi fornese medikamentu ba ospitál sira.

Nia dehan, hafoin CAC simu tiha denúnsia ba kazu ne’e, CAC halo kedan averiguasaun no hafoin halo tiha averiguasaun CAC halo kedan auto-partisipasaun ba Ministériu Públiku (MP).

“Ba kazu ida ne’e, depois CAC halo tiha avariguasaun no CAC konklui ona auto partisipasaun no ida ne’e ita haruka ona ba iha Ministériu Públiku iha 12 fevereiru foin daudaun ne’e,” José Verdial hateten.

Ezekutivu ne’e dehan, kazu sira ne’ebé CAC remete ba MP signifika kazu sira ne’ebé iha ona indisiu krimi tanba ne’e haforsa ho informasaun sira ne’ebé mak iha dokumentu sira ne’ebé mak iha indísiu ba iha krimi korrupsaun ninian.

“Kuandu ida ne’ebé ita haruka ba Ministériu Públiku ne’e ita haree katak hodi haforsa ho informasaun sira ne’ebé mak iha dokumentu sira ne’ebé mak iha indísius ba iha krimi korrupsaun ninian,” nia adianta.

Diretór Investigasaun CAC, José Verdiál informa katak dehan depende ba Ministériu Públiku nia haree seraké ida ne’e iha krimi korrupsaun ka lae tanba MP mak iha kompeténsia para halo apresiasaun.

“Kuandu sira haree katak iha evidénsia dokumentu insiál sira ne’ebé mak ita aprezenta ne’e mak priense rekezitu legál entaun sira bele rejistu ida ne’e ba inkeritu,” nia esplika.

José Verdiál hateten, iha janeiru no fevereiru tinan ne’e CAC mós rejista kazu denúnsia haat.

“Ha’u labele temi tipu denúnsia haat ne’e tanba agora dadaun investigadór sira sei haree halo analiza seráke denúnsia haat ne’e priense ba krimi korrupasaun ka la ne’e ita seidauk hatene,” nia tenik.

Tanba, tuir nia, CAC labele hateten denúnsia ne’e hotu hotu indísiu ba krimi CAC tenke haree ba denunsiu sira ne’e kuandu ida ne’ebé tama ba kompeténsia CAC atu haree ida ne’e maka CAC sei konsidera, kuandu ida ne’e la tama kompeténsia CAC nian sei CAC sei kontaktu denunsiante sira hodi dirije ba institusaun seluk tanba CAC ne’e sei haree liu ba iha kestaun krimi korrupsaun.

Notísia relevante:CAC submete kazu 38 inklui Ró Haksolok ba MP

Jornalista: Natalino Costa

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!