Ai-moruk prevensaun HIV-SIDA estoke out iha HorEX Baucau
BAUCAU, 04 marsu 2024 (TATOLI) – Ai-moruk importante ba prevensaun HIV-SIDA hamutuk item rua estoke out iha Ospitál Rejionál Eduardo Ximenes (HorEX, sigla portugés) Baucau.
Konsellor tratamentu ba moras HIV SIDA nian iha HoREX Baucau, Sabino de Carvalho, esplika, situasaun menus ai-moruk HoREX hasoru durante fulan-neen ona hanesan ai-moruk Azitrhomycin no Cifexime ne’ebé kategoria ba prevensaun dahuluk hanesan Gonore ho Klamedia nune’e pasiente sira tenke sosa iha klínika privadu.
“Agora ita-nia aimoruk laiha, ida naran Azitrhomycin no Cifexime kuaze fulan lima ona,” Konsellor HIV-Sida HoREX Baucau hateten iha Vila Nova, segunda ne’e.
Maske parte HoREX Baucau hato’o ona pedidu menus ai-moruk item rua refere liuhosi enkontru iha nasionál maibé to’o agora seidauk rezolve tanba razaun estoke ai-moruk item rua refere laiha armazein.
Sabino Carvalho, argumenta HoREX kontinua halo atendimentu no husu ba pasiente sira atu kontinua halo tratamentu tanba moras refere kategoria perigozu vida bainhira lahalo tramentu rútina.
HIV-SIDA ho síntoma hanesan soe bee-kiik sente moras no manas inklui fo’er mutin sempre belit tanba kauza husi halo relasaun seksuál.
“Kuandu la halo tratamentu sei fó impaktu tantu feto mane, sira tenke halo tratamentu hanesan hemu ai-moruk to’o idade avansadu,” Sabino Carvalho akresenta.
HoREX Baukau rejista sidadaun ne’ebé sofre moras HIV-SIDA hamutuk 36 kompostu husi feto 12 no mane 24 ne’ebé maihosi munisípiu Lautém, Viqueque no Baucau.
Jornalista : Natalino Belo
Editór : Evaristo Soares Martins
