Komunidade kontinua hein reabilitasaun estrada iha suku Samalari
BAUCAU, 05 marsu 2024 (TATOLI) – Komunidade kontinua hein prosesu reabilitasaun estrada rurál iha área suku Samalari, postu administrativu Baucau vila.
Xefe suku Samalari, Rui Sertório Magno Sequeira, esplika, kondisaun estrada iha área Samalari tinan naruk ona hetan estragus nune’e fó impaktu ba prosesu movimentu transporte liuliu transportasaun produtu ba merkadu.
“Ha’u halerik beibeik ba estrada, parte ministériu obra públika halo ona estudu viabilidade no ami prontu kontribui atu la selu indemnizasaun bainhira reabilita estrada,” Xefe suku Samalari hateten iha Vila Antiga, tersa ne’e.
Kondisaun estrada refere hetan kategoria ona ba grave tanba impaktu hosi udan nune’e bele afeta mós ba ambulánsia bainhira tula moras iha situasaun emerjénsia.
Autoridade lokál hetan ona informasaun prosesu reabilitasaun estrada sei hahú iha tinan-ne’e nune’e povu Samalari nafatin hein ho esperansa no sempre prontu kontribui iha parte seguransa.
“Husu atu konstrui mos ponte no tuir informasaun implementa tinan-ne’e ho kategoria reabilitasaun,” Rui Sequeira akresenta.
Tuir dadus estrada ne’ebé presiza reabilita ho distánsia kilómetru 10.5 ne’ebé sei lokaliza hosi Buisama, suku Buibau to’o Samalari ne’ebé sei benefísia ba suku hamutuk 13 hanesan komunidade sira hosi postu Quelicai inklui postu Uatulari no Uatucrbao, munisípiu Viqueque.
Suku Samalari hamutuk aldeia haat kompostu Solurai, Festau, Samalari no Ossoluga ho tótal populasaun 3.187 hosi uma-kain 681.
Jornalista : Natalino Belo
Editór : Evaristo Soares Martins
