BAUCAU, 06 marsu 2024 (TATOLI) – Prosesu implementasaun programa merenda eskolár iha munisípiu Baucau seidauk realiza tanba transferensia orsamentu tarde.
Diretór Servisu Munisipál Edukasaun Baucau, Afonso dos Santos Freitas, esplika, programa refere iha ona kontratu ho ekipa jestaun programa no tuir kalendáriu sei hahú faze dahuluk iha fulan-marsu maibe iha adiamentu tanba kestaun orsamentu.
“Ami-nia pedidu tama ona, sei kontinua ba banku foti osan mak foin implementa,” Diretór Servisu Munisipál Edukasaun Baucau hateten iha Vila Nova, kuarta ne’e.
Selebrasaun kontratu entre edukasaun Baucau hamutuk ho EJP-merenda eskolár finaliza ona inklui halao hato’o ona pedidu levantamentu orsamentu nune’e iha tempu besik sei hahú faze dahuluk.
Objetivu hosi implementasaun programa refere atu hasae nutrisaun no motiva vontade estuda ba estudante sira liuhosi tipu ai-haan tolu hanesan ai-haan haforsa, ai-haan haburas no ai-haan protesaun.
“Menu ai-han ne’ebé prioridade implementa iha programa merenda eskolar 2024 mak hahan nutrisaun, hanforsa no haburas,” Afonso Freitas akresenta.
Programa merenda eskolár iha munisípiu Baucau sei implementa fazeadamente ho tótal orsamentu hamutuk millaun $ 2.98 ho total benefisiáriu hamutuk rihun 20-resin kompostu hosi estudante pre-eskolar no ensinu baziku ho totál eskola hamutuk 58.
Jornalista : Natalino Belo
Editór : Evaristo Soares Martins
