Turista Amerikanu kontente ho Turismu Timor ne’ebé atrativu
DILI, 06 marsu 2024 (TATOLI) – Turista internasionál husi Amerika, Anthony Blair kontente ho Turismu Timor nian ne’ebé furak no atrai tebes.
“Turista internasionál sira husi Amerika, Anthony Blar ho idade (71) ho nia feen kaben hakfodak tebes ho Timor-Leste nia turismu ne’ebé iha situasaun furak no mós ema amigavel tebes.
“Ida-ne’e mak dahuluk ami vizita Timor-Leste, situasaun ne’e furak tebes liuliu tasi no ema sira-ne’e amigavel tebes no atrai ami-nia vizita, ami sei kontinua konvida ami-nia kolega sira iha Amerika atu kontinua vizita Timor-Leste”, Anthony Blair informa bainhira iha Portu, ohin.
Nia hatutan, situasaun iha Timor-Leste furak tebes, tanba ne’e infraestrutura turizmu tenke jere didi’ak hodi atrai turista internasionál barak liután hodi vizita Timor-Leste hodi diversifika kreximentu ekonómiku nasaun nian.
“Timor-Leste furak tebes, tanba ne’e infraestrutura turizmu tenke jere didi’ak hodi atrai turista internasionál barak liután hodi vizita Timor-Leste ba futuru nune’e diversifika kreximentu ekonómiku nasaun nian”, nia afirma.
Iha sorin seluk, Diretora Marketing Turismu Relasaun Internasionál iha Ministériu Turismu no Ambiente, Ivania Ros Ximenes Gonçalves, informa turista besik 1000 resin mak vizita Timor-Leste iha loron kuarta-feira ho ró rua Sebourn Odyssey no Seabourn Sojourn. Ro rua ne’e to’o iha Portu Dili tuku 7:00 dadeer oras Timor-Leste.
“Ida-ne’e foin primeira-vez ro rua vizita Dili. Antes ne’e ro rua ne’e halo viajen husi Darwin Austrália no sei fila fali ba Kupang Indonézia iha oras tuku 18 :00 lorokraik”, Ivania Ros Ximenes Gonçalves dehan.
Iha Ró Sebourn Odyssey hamutuk ho ekipa na’in 354 no turista na’in 390 ho idade tinan 50 no liu husi nasaun oioin hanesan Estadus Unidus, Austrália, Kanada, Bretana, Nova Zelandia, Alemana, Austria, Xina, Singapura, Afrika Sul, Irlanda, Islandia, Suisa no Beljika.
No ida ró seluk hanesan Seabourn Sojourn hamutuk ho ekipa 355 no turista 342 ho idade tinan 50 no liuhosi nasaun oioin hanesan Amerika, Bretana Boot, Kanada, Australia, Alemana, Olanda, Nova Zelandia, Suisa, Irlanda, Italia, Japaun, Singapura, Espana, Mexiku, Afrika Sul, Luxemark, Tailandia, Islandia, Beljika, Dinamarka, Gregu no Austria.
“Prezensa turista sira-ne’e signifikante tebes iha aumentu reseita ba ita-nia empreza lokál sira iha Portu Dili”, nia relata.
Nune’e iha Dili, turista sira vizita fatin oioin hanesan Cristo Rei, Timor Plaza, Tais Market, Centro Nacional Chega (CNC) Muzeu Rezisténsia Timor – Leste (AMRT) no semintériu Santa Cruz. Aleinde ne’e, turista sira sei vizita mós Kafe Memorial Dare no Munisipiu Ermera, liuliu iha Timor Global, hanesan kompañia ida husi indústria kafé iha Timor-Leste.
Jornalista : Felicidade Ximenes
Editór : Zezito Silva
