BAUCAU, 07 marsu 2024 (TATOLI) – Kandidatu profesór hamutuk na’in-745 liu selesaun dokumentu hodi tuir teste ne’ebé fó-sai hosi Ministériu Edukasaun iha tempu badak.
Diretór Servisu Munisipál Edukasaun Baucau, Afonso dos Santos Freitas, esplika, lista kandidatura ne’ebé liu selesaun fó-sai ona iha kuadru avizu ne’ebé submete hamutuk kandidatura na’in-774.
“Bainhira kandidatu 745 liu ona teste la’ós atu hanorin iha Baucau de’it, natoon rejista ba munisípiu tolu, hakarak hanorin ne’ebé kuandu liu ba de’it,” Diretór Servisu Munisipál Edukasaun Baucau iha Vila Nova, tersa ne’e.
Hosi 774 liu selesaun hamutuk na’in-745 kompostu feto 499 no mane na’in-246 no na’in-29 mak la liu selesaun tanba seidauk prienxe kritéria hanesan diploma sekundária.
Afonso Freitas, husu kandidatura hotu ne’ebé liu ona selesaun dokumentu iha vaga bolsa rekrutamentu profesór atu prepara aan hodi tuir teste eskrita iha komisaun funsaun públiku (CFP, sigla portugés).
“Eskola balun professór ida de’it hanesan EBF Osouaque, Venilale nune’e kandidatura balun liu ona selesaun dokumentu,” Afonso Freitas akresenta.
Hosi totál kandidatu na’in-745 bainhira pasa iha teste sei destaka tuir kada eskola no la’ós iha munisípiu Baucau de’it maibé prontu hanorin iha munisípiu seluk ne’ebé menus profesór tuir orientasaun Ministériu Edukasaun.
Antes ne’e profesór kontratadu hosi munisípiu Baucau hamutuk na’in-277 mak termina kontratu iha fulan-dezembru tinan-2023 ne’ebé destaka iha nível pre-eskolár, ensinu báziku, sekundária no tékniku vokasionál, hanesan eskola sekundária Dom Carlos Belo suku Afaça, postu Quelicai maioria kontratadu hamutuk na’in-13, voluntáriu na’in-rua no permanente na’in-rua.
Tuir dadus totál eskola iha munisípiu Baucau hamutuk 243, komposta hosi pre-eskolár 30, ensinu báziku 185, sekundária 23 no tékniku vokasionál lima.
Jornalista : Natalino Belo
Editór : Evaristo Soares Martins
