Kandidatu traballadór Austrália 7000-resin tuir teste iha Baucau
BAUCAU, 09 marsu 2024 (TATOLI) – Kandidatura traballadór Austrália hamutuk 7000-resin iha sábadu ne’e, tuir teste eskrita iha Munisípiu Baucau.
Sekretáriu Estadu Formasaun Profisionál no Empregu (SEFOPE), Rogerio Araújo Mendonça, esplika katak teste iha Baucau ne’e ligadu ho Vaga Austrália ne’ebé fó-sai liuhosi online ho objetivu atu minimiza gastu kandidatu sira-nian bainhira tuir teste iha kapitál Dili no bele sai sasukat ba totál kandidatura iha kada munisípiu.
“Teste iha munisípiu tanba atu ita-nia joven sira asesu di’ak liután no mós redús kustu ba sira”, Rogerio hateten iha Vila nova.
SEFOPE rasik realiza ona teste lian Inglés ba kandidatura traballadór sira iha Rejiaun Admistrativa Espesiál Oecuse Ambeno (RAEOA), Aileu, Ainaro, Covalima inklui Manufahi.
Teste ida-ne’e finaliza iha Munisípiu Viqueque no Baucau, tuir planu sei kontinua ba munisípiu seluk hafoin halo koresaun ba matéria teste no kontinua ba teste entervista no sei remata ho sistema Getready for plam scheme interview test ne’ebé estabelese hosi Austrália.
“SEFOPE la dEiside, kandidatu sira ne’ebé tuir teste eskrita mak bainhira hotu, sira tama ona iha entervista mak foin hatama ba sistema, kompeténsia sira atu ba ka la ba ne’e kompañia mak hili tuir sira-nia kapasidade no abilidade”, Rogerio Mendonça akresenta.
Rogerio Mendonça, husu ba kandidatu sira bainhira liu iha teste no hetan fiar hosi kompañia tenke kuidadu naran nasaun nian liuhosi atitude no vontade servisu.
Prezidente Autoridade Munisípiu Baucau, Veneranda Eurico Marques Lemos Martins, hateten situasaun atu´sl la iha kampu traballu ba sidadaun sira liuliu juventude, tanba ne’e Governu liuhosi SEFOPE kria polítika hodi redús taxa dezempregu hanesan haruka sidadaun ba serbisu iha rai-liur hanesan Austrália no Korea Sul.
“Sai ona ba liur hatudu disiplina, lori postu neen iha Munisípiu Baucau tomak nia naran, la’os ema individuál, hatudu disiplina ami no sei orgullu ba imi”, Veneranda Lemos refere.
Totál kandidatura ba vaga Austrália hosi Munisípiu Baucau ne’ebé tuir teste hamutuk 7.045 durante loron-rua hosi loron-sábadu to’o domingu, 09-10 fulan-marsu.
Jornalista : Natalino Belo
Editór : Zezito Silva
