iklan

BAUCAU, HEADLINE, MUNISÍPIU, SEGURANSA

Mikrolete haat hetan tuda hosi ema deskoñesidu iha Baucau

Mikrolete haat hetan tuda hosi ema deskoñesidu iha Baucau

Mikrolete diresaun Baucau Vila ne'ebé hetan tuda hosi ema deskoñesidu iha área Vila Antiga. Imajen espesiál.

BAUCAU, 12 marsu 2024 (TATOLI ) – Mikrolete publiku diresaun Vila Antiga no Vila Nova hamutuk haat hetan tuda hosi ema deskoñesidu iha área Pouzada suku Bahú, postu Baucau Vila.

Komandante Eskuadra Polísia Baucau Vila, Inspetór Asistente, Daniel da Costa Freitas, esplika iha segunda, 11 marsu akontese ema deskoñesidu tuda karreta mikrolete haat refere dalarua iha oras ne’ebé diferente hanesan dadeersan oras 11:00 resin no lokraik purvolta 18:00.

“Horisehik karreta haat mak hetan tuda mas ida mak grave,” Komandante Eskuadra Baucau Vila hateten iha Vila Antiga, tersa ne’e.

Hosi akontesementu refere rezulta mikrolete ida ho xapa-matríkula 38-068 rahun iha parte vidru oin, enkuantu rua seluk hetan estragus kmaan no mikrolete ida direitamente hato’o keixa iha komandu munisípiu.

Eskuadra Baucau Vila hafoin simu informasaun hosi vítima direitamente to’o iha fatin akontesimentu maibé la konsege kaptura autór ba akontesimentu refere nune’e kontinua orienta patrulla liuhosi Ofisiál Polísia Suku (OPS), SIP no fontes informasaun seluk atu buka tuir autor ba kazu refere.

“Informasaun hosi vítima sira katak, autor sira buka tuir pasajeiru balun mak derrepente tuda, mas dehan autor ne’e falun nia aan neebe sira la koñese,” Daniel Freitas akresenta.

Portavos kondutór transporte públiku, Francisco Marques, lamenta ho akontesimentu refere no husu ba PNTL munisípiu Baucau atu buka tuir autór ba kazu tuda rahun karreta iha Vila Antiga atu kontinua prosesu ba investigasaun.

“Ami husu PNTL buka tuir autór nee, tanba dala barak ona kazu tuda karreta no baku kondutór sira-ne’e dalabarak ona iha área Vila Antiga,” Francisco Marques haktuir.

Jornalista : Natalino Belo 

Editór : Evaristo Soares Martins 

iklan
iklan

Leave a Reply

iklan
error: Content is protected !!