Reabilitasaun estrada rurál iha Afaloicai paradu
BAUCAU, 13 marsu 2024 (TATOLI) – Prosesu reabilitasaun estrada rurál iha suku Afaloicai, postu administrativu Baguia liuhosi Programa Nasionál Dezenvolvimentu Suku paradu.
Xefe Suku Afaloicai, Germano João Baptista, esplika, projetu refere relasiona ho atividade programa regulár hosi PNDS liuhosi Orsamentu Jerál Estadu (OJE) tinan-2023 ne’ebé paradu no seidauk iha esplikasaun hosi parte PNDS Baucau.
“Ami halo ona koordenasaun PNDS postu Baguia mos to’o agora nee sira seidauk kontinua implementa,” Xefe suku Afaloicai informa bá Agência Tatoli liuhosi telefónika, kuarta ne’e.
Programa regulár ba reabilitasaun estrada rurál implement hosi área Uagalede, aldeia Oki-lari to’o Laudere ho totál metru 600 ho tipu nahe ho simentu, maibé finaliza de’it metade, enkuantu metru 300 sei hein kontinuasaun.
Kona-ba mobilizasaun materiál serbisu iha ona terrenu dezde atividade refere inísiu hanesan simentu, rai-henek, britas no fatuk maibé tanba paradu nune’e materiál hirak-ne’e balun hahú estragus tanba iha tempu udan.
“Ita-nia komunidade sira serbisu ho voluntáriu, tanba hakarak kondisaun estrada ba suku ne’e diak, PNDS la fó informasaun kontinua serbisu ka lae,” João Baptista akresenta.
Totál orsamentu ba atividade programa regulár reabilitasaun estrada rurál iha suku Afaloicai liuhosi OJE 2023 hamutuk $45.551,65 ne’ebé aloka ba kustu badaen hamutuk rihun $ 2.400.
Suku Afaloicai hamutuk aldeia haat kompostu Buibela, Lena’a, Okilari inklui Uaimate ho totál populasaun hamutuk 1.315 hosi uma-kain 258.
Jornalista : Natalino Belo
Editór : Evaristo Soares Martins
